മലപ്പുറം: പച്ചപുതച്ചു നില്‍ക്കുന്ന ഐക്യജനാധിപത്യ മുന്നണിയുടെ ഉറച്ച കോട്ടയായാണ് മലപ്പുറം അറിയപ്പെടുന്നത്. തെരഞ്ഞെടുപ്പ് പാര്‍ലമെന്റിലേക്കായാലും നിയമസഭയിലേക്കായാലും അതില്‍ വലിയ മാറ്റമുണ്ടാകാറില്ല. മുസ്‌ലിം ലീഗ് പാര്‍ട്ടിക്ക് ജില്ലയിലുള്ള വര്‍ധിത സ്വാധീനമാണ് ഇതിന് അടിസ്ഥാനം. 12ന് നടക്കുന്ന മലപ്പുറം ലോകസഭാ മണ്ഡലം ഉപതെരഞ്ഞെടുപ്പിലും ലീഗിന്റെ കരുത്താണ് യു.ഡി.എഫിന്റെ വിജയപ്രതീക്ഷ.
മലപ്പുറം പാര്‍ലമെന്റ് മണ്ഡലത്തില്‍ (മുന്‍പ് മഞ്ചേരി) ഇതുവരെ നടന്നത് 16 ലോക്‌സഭാ തെരഞ്ഞെടുപ്പ്. ഇതില്‍ 15ലും വിജയക്കൊടി പാറിച്ചത് യു.ഡി.എഫ് സ്ഥാനാര്‍ഥികളാണ്. 2004ല്‍ അന്നത്തെ മഞ്ചേരിയില്‍ സി.പി.എമ്മിലെ ടി.കെ ഹംസ മുസ്‌ലിം ലീഗിലെ കെ.പി.എ മജീദിനെ അട്ടിമറിച്ചത് മാത്രമാണ് ഇടതുനേട്ടമായി മണ്ഡലത്തിന്റെ ചരിത്രത്തിലുള്ളത്. പിന്നീട് 2009ല്‍ മഞ്ചേരി മലപ്പുറമായപ്പോള്‍ മുസ്‌ലിം ലീഗിലെ ഇ. അഹമ്മദ് ടി.കെ ഹംസയെ പരാജയപ്പെടുത്തി. കഴിഞ്ഞതവണയും യു.ഡി.എഫിനായി ഇ. അഹമ്മദ് തന്നെയായിരുന്നു മത്സരരംഗത്ത്. സി.പി.എം സംസ്ഥാന കമ്മിറ്റിയംഗം പി.കെ സൈനബയായിരുന്നു മുഖ്യഎതിരാളി. അന്ന് 1,94,739 വോട്ടിന് വിജയിച്ച് ഇ. അഹമ്മദ് ഡല്‍ഹിക്ക് വിമാനം കയറി.
ഇ. അഹമ്മദിന്റെ നിര്യാണത്തെത്തുടര്‍ന്ന് നടക്കുന്ന ഉപതെരഞ്ഞടുപ്പില്‍ യു.ഡി.എഫിനായി മത്സരിക്കുന്നത് മുസ്‌ലിം ലീഗ് ദേശീയ ജനറല്‍ സെക്രട്ടറിയും മുന്നണിയിലെ പ്രമുഖനുമായ പി.കെ കുഞ്ഞാലിക്കുട്ടിയാണ്. മറുപക്ഷത്ത് അദ്ദേഹത്തെ നേരിടാന്‍ എല്‍.ഡി.എഫ് സ്ഥാനാര്‍ഥിയായി ഡി.വൈ.എഫ്.ഐ മലപ്പുറം ജില്ലാ പ്രസിഡന്റും മലപ്പുറം ജില്ലാ പഞ്ചായത്തംഗവുമായ അഡ്വ. എം.ബി ഫൈസലാണുള്ളത്. ബി.ജെ.പി മലപ്പുറം ജില്ലാ വൈസ് പ്രസിഡന്റ് അഡ്വ. എന്‍. ശ്രീപ്രകാശാണ് എന്‍.ഡി.എ സ്ഥാനാര്‍ഥി. മുന്നണി സ്ഥാനാര്‍ഥികള്‍ക്ക് പുറമെ മറ്റു ആറു സ്ഥാനാര്‍ഥികളും രംഗത്തുണ്ട്.
യു.ഡി.എഫ് സ്ഥാനാര്‍ഥി പി.കെ കുഞ്ഞാലിക്കുട്ടി ആദ്യമായാണ് ലോക്‌സഭയിലേക്ക് മത്സരിക്കുന്നത്. അദ്ദേഹത്തിന് തെരഞ്ഞെടുപ്പ് പോരാട്ടത്തില്‍ ഇതു പത്താം അങ്കമാണ്. 1980ല്‍ മലപ്പുറം നഗരസഭയിലേക്ക് കന്നി മത്സരത്തിനിറങ്ങിയ കുഞ്ഞാലിക്കുട്ടിക്ക് പിന്നീട് തിരിഞ്ഞുനോക്കേണ്ടി വന്നിട്ടില്ല. നിയമസഭയിലേക്ക് ഏട്ടുതവണ മത്സരിച്ച് ഏഴുതവണ വിജയിച്ചു. 2006ല്‍ കുറ്റിപ്പുറത്ത് നാലാമങ്കത്തിനിറങ്ങിയപ്പോള്‍ കെ.ടി ജലീലിനോട് തോല്‍വി ഏറ്റുവാങ്ങി. എം.എസ്.എഫിലൂടെ രാഷ്ട്രീയ രംഗത്തെത്തിയ കുഞ്ഞാലിക്കുട്ടി പാര്‍ട്ടിയിലും മുന്നണിയിലും നിര്‍ണായക പദവികള്‍ വഹിച്ചിട്ടുണ്ട്. നിലവില്‍ പാര്‍ട്ടി നിയമസഭാ കക്ഷിനേതാവും പ്രതിപക്ഷ ഉപനേതാവുമാണ്. കേന്ദ്ര-സംസ്ഥാന സര്‍ക്കാരുകളുടെ ജനവിരുദ്ധ ഭരണമാണ് യു.ഡി.എഫിന്റെ മുഖ്യപ്രചാരണ വിഷയം.
അതേസമയം പരിചയ സമ്പത്തിനെ യുവത്വം കൊണ്ട് നേരിടാനാണ് മണ്ഡലത്തില്‍ എല്‍.ഡി.എഫിന്റെ ശ്രമം. കുഞ്ഞാലിക്കുട്ടിയെ എതിരിടുന്നത് ഡി.വൈ.എഫ്.ഐ നേതാവ് എം.ബി ഫൈസലാണ്. അദ്ദേഹത്തിന്റെ രാഷ്ട്രീയ പ്രവേശനം എസ്.എഫ്.ഐയിലൂടെയാണ്. എസ്.എഫ്‌ഐ ജില്ലാ ജോ. സെക്രട്ടറി, വൈസ് പ്രസിഡന്റ്, ഡി.വൈ.എഫ്.ഐ എടപ്പാള്‍ ബ്ലോക്ക് സെക്രട്ടറി, കാലിക്കറ്റ് സര്‍വകലാശാല യൂനിയന്‍ കൗണ്‍സിലര്‍ തുടങ്ങിയ പദവികള്‍ വഹിച്ചിട്ടുണ്ട്. ലോക്‌സഭയിലേക്ക് ആദ്യമായാണ് മത്സരിക്കുന്നത്. യു.ഡി.എഫ് അനുകൂല മണ്ഡലമാണെങ്കിലും '2004ലെ പഴയ മഞ്ചേരി'യാണ് പ്രചാരണത്തില്‍  എല്‍.ഡി.എഫിന്റെ പ്രതീക്ഷ വര്‍ധിപ്പിക്കുന്നത്. 2004 ആവര്‍ത്തിക്കുമെന്നും ഇവര്‍ ഉറപ്പിച്ചു പറയുന്നു. കേന്ദ്ര സര്‍ക്കാരിന്റെ ജനവിരുദ്ധ നയങ്ങളും ന്യൂനപക്ഷ സംരക്ഷണവുമാണ് എന്‍.ഡി.എഫിന്റെ പ്രചാരണായുധം.
കഴിഞ്ഞ തവണ മത്സരിച്ച അഡ്വ. എന്‍. ശ്രീപ്രകാശ് തന്നെയാണ് ഈ ഉപതെരഞ്ഞെടുപ്പിലും ബി.ജെ.പി സ്ഥാനാര്‍ഥി. എസ്.ഡി.പി.ഐ, വെല്‍ഫെയര്‍ പാര്‍ട്ടി, പി.ഡി.പി അടക്കമുള്ള പാര്‍ട്ടികള്‍ക്ക് ഇത്തവണ സ്ഥാനാര്‍ഥികളില്ല. മനഃസാക്ഷി വോട്ട് ചെയ്യാനാണ് എസ്.ഡി.പി.ഐ അണികള്‍ക്ക് നല്‍കിയ നിര്‍ദേശം. വെല്‍ഫെയര്‍ പാര്‍ട്ടിയുടെ നിലപാട് ഇന്നു പ്രഖ്യാപിക്കും. മണ്ഡലത്തിലെ ആകെ വോട്ടര്‍മാര്‍ 13,12,693 പേരാണ്. ഇതില്‍ 15756 പേര്‍ പുതുവോട്ടര്‍മാരാണ്.