ന്യൂഡല്‍ഹി: കേരളത്തിന്റെ പ്രളയ ദുരിതാശ്വാസ പ്രവര്‍ത്തനങ്ങളില്‍ മറ്റു സംസ്ഥാനങ്ങള്‍ക്കും രാജ്യങ്ങള്‍ക്കും മാതൃകയുണ്ടെന്ന് മുഖ്യമന്ത്രി പിണറായി വിജയന്‍. സാര്‍ക്ക് രാജ്യങ്ങളിലെ ദുരന്ത നിവാരണ നിയമങ്ങള്‍ സംബന്ധിച്ച് നിയമവിദഗ്ധരായ ഡോ. എസ്. ശിവകുമാര്‍, മനോഹര്‍ തയ്‌രാനി, ഡോ. ലിസ പി. ലൂക്കോസ് എന്നിവര്‍ തയാറാക്കിയ പുസ്തകം കേരളഹൗസ് കോണ്‍ഫറന്‍സ് ഹാളില്‍ പ്രകാശനം ചെയ്തു സംസാരിക്കുകയായിരുന്നു അദ്ദേഹം.

പ്രകൃതി ദുരന്തങ്ങളുടെ വിവിധ തലങ്ങളെക്കുറിച്ചുള്ള ആഴമേറിയ പഠനങ്ങള്‍ ഉള്‍പ്പെടുത്തിയുള്ള പുസ്തകം സാര്‍ക്ക് രാജ്യങ്ങളിലെ ദുരന്തനിവാരണ നിയമങ്ങളെ സമഗ്രമായി വിശകലനം ചെയ്യുന്നുണ്ട്. ഏറ്റവും കൂടുതല്‍ പ്രകൃതി ദുരന്തങ്ങള്‍ക്കിരയാകുന്ന മേഖലയാണ് സാര്‍ക്ക് രാജ്യങ്ങള്‍. ഈ മേഖലയിലെ ജനസംഖ്യയില്‍ 70 ശതമാനം പേര്‍ ദരിദ്രരാണെന്നതുകൊണ്ടുതന്നെ പ്രകൃതിക്ഷോഭങ്ങളുടെ പ്രത്യാഘാതങ്ങള്‍ രൂക്ഷമാണ്. ഒരു നിമിഷംകൊണ്ട് എല്ലാം ഇല്ലാതാകുന്ന അവസ്ഥ എന്താണെന്ന് ഊഹിക്കാനാവുന്നതാണെന്നും മുഖ്യമന്ത്രി പറഞ്ഞു. വ്യവസായ മന്ത്രി ഇ.പി ജയരാജന്‍ അധ്യക്ഷനായി. മുഖ്യമന്ത്രിയുടെ മാധ്യമ ഉപദേഷ്ടാവ് ജോണ്‍ ബ്രിട്ടാസ് പുസ്തകം പരിചയപ്പെടുത്തി.