കൊച്ചി: ബോട്ട് അപകടത്തെ തുടര്‍ന്ന് കടലില്‍ അകപ്പെട്ട അഞ്ച് മത്സ്യത്തൊഴിലാളികളെ കൊച്ചി നാവികസേന രക്ഷപ്പെടുത്തി. അഴീക്കല്‍ തുറമുഖത്തിന് 35 കിലോമീറ്റര്‍ ദൂരെ വടക്കുപടിഞ്ഞാറ് മേഖലയിലാണ് ഓംകാരം എന്ന ബോട്ടില്‍ മത്സ്യബന്ധനത്തിനെത്തിയ കാഞ്ഞങ്ങാട് സ്വദേശികളായ ബോട്ടുടമ മനോഹരന്‍ (56), വാസവ് (57), ചന്ദ്രന്‍ (60), സുരേഷ് (42), സുരേന്ദ്രന്‍ (49) എന്നിവരാണ് കടലില്‍വീണത്. തിങ്കളാഴ്ച രാവിലെ 9.30നായിരുന്നു സംഭവം.

കൊച്ചി നാവികസേന ആസ്ഥാനത്തെ കപ്പലായ ഐ.എന്‍.എസ് ഷാര്‍ദയിലെ ഉദ്യോഗസ്ഥര്‍ പട്രോളിങ്ങിനിടെയാണ് ബോട്ട് അപകടത്തില്‍പ്പെട്ട് തൊഴിലാളികള്‍ കടലില്‍ വീണുകിടക്കുന്നത് കണ്ടത്. തുടര്‍ന്ന് കപ്പലിലെ ലൈഫ് ബോട്ടുകള്‍ കടലിലിറക്കി അഞ്ചുപേരെയും രക്ഷിക്കുകയായിരുന്നു.

പരുക്കേറ്റ രണ്ട് മത്സ്യത്തൊഴിലാളികള്‍ക്ക് കപ്പലിലെ മെഡിക്കല്‍സംഘം പ്രാഥമിക ശുശ്രൂഷ നല്‍കി. കാസര്‍കോട് ചെറുവത്തൂരില്‍നിന്നു തിങ്കളാഴ്ച പുലര്‍ച്ചെ നാലുമണിക്ക് പുറപ്പെട്ടതാണെന്നും ശക്തമായ തിരമാലയില്‍പ്പെട്ട് ബോട്ടിനുള്ളില്‍ വെള്ളം കയറി അപകടത്തില്‍പ്പെടുകയായിരുന്നുവെന്നും മത്സ്യത്തൊഴിലാളികള്‍ പറഞ്ഞു.

മൊബൈല്‍ നെറ്റ് വര്‍ക്ക് പരിധിക്ക് പുറത്തുള്ള സ്ഥലത്തുവച്ചായിരുന്നു അപകടം.
മറ്റു ബോട്ടുകളുടെ സഹായം ആവശ്യപ്പെടാനോ നീന്താനോ കഴിയാതെ തളര്‍ന്ന സാഹചര്യമായിരുന്നു.
കപ്പലുകളുടെ ശ്രദ്ധയാകര്‍ഷിക്കാന്‍ നോക്കിയെങ്കിലും നടന്നില്ലെന്നും അവര്‍ വ്യക്തമാക്കി. കമാന്‍ഡര്‍ ആര്‍. അനൂപും സംഘവുമാണ് രക്ഷാപ്രവര്‍ത്തനത്തിന് നേതൃത്വം നല്‍കിയത്.