കല്‍പ്പറ്റ: ജില്ലയുടെ ഏറ്റവും പ്രധാനപ്പെട്ടതും വികസനത്തില്‍ നിര്‍ണായകവുമായ വയനാട് മെഡിക്കല്‍ കോളജ്, ചുരം ബദല്‍ റോഡ്, രാത്രിയാതാനിരോധനം തുടങ്ങിയ വിഷയത്തില്‍ എല്‍.ഡി.എഫ് സര്‍ക്കാരിന്റെ ആദ്യ ബജറ്റ് മൗനം പാലിച്ചത് പ്രതിഷേധാര്‍ഹമാണെന്ന് മുസ്‌ലിം ലീഗ് ജില്ലാ പ്രസിഡന്റ് പി.പി.എ കരീം, ജനറല്‍ സെക്രട്ടറി കെ.കെ അഹമ്മദ് ഹാജി എന്നിവര്‍ പറഞ്ഞു. മെഡിക്കല്‍ കോളജ് യഥാര്‍ഥ്യമാക്കുമെന്ന് പറഞ്ഞാണ് എല്‍.ഡി.എഫ്. ജില്ലയിലെ വോട്ടര്‍മാരെ സമീപിച്ചത്. ജയിച്ചുവന്ന സി.കെ. ശശീന്ദ്രന്‍ എം.എല്‍.എ. യും മെഡിക്കല്‍ കോളജ് യാഥാര്‍ഥ്യമാക്കുമെന്ന് പ്രഖ്യാപിച്ചിരുന്നു. എന്നാല്‍ മെഡിക്കല്‍ കോളജ് സംബന്ധിച്ച കാര്യങ്ങളൊന്നും ബജറ്റിലില്ല. വയനാട്ടിലെ അതീവ ഗുരുതരമായ വന്യമൃഗശല്യം തടയുന്നതിന് വേണ്ടി ബജറ്റില്‍ കാര്യമായ നിര്‍ദേശങ്ങളില്ല.
മുഴുവന്‍ ആദിവാസികള്‍ക്കും ഭൂമി ലഭ്യമാക്കുമെന്ന് അവകാശപ്പെട്ടുകൊണ്ട് വ്യാപകമായി ആദിവാസി ഭൂസമരങ്ങള്‍ നടത്തിയവര്‍ അധികാരത്തിലെത്തിയിട്ടും അതിനായി കാര്യമായ ഫണ്ടൊന്നും വകയിരുത്തിയിട്ടില്ല. ഉന്നത വിദ്യാഭ്യാസ രംഗത്ത് വന്‍ പ്രതീക്ഷയാകുമായിരുന്ന ചെതലയത്തെ ഗോത്രവര്‍ഗ വിദ്യാര്‍ഥികള്‍ക്കായുള്ള രാജ്യത്തെ ആദ്യ കോളജ്, അമ്പലവയല്‍ കാര്‍ഷിക കോളജ് തുടങ്ങിയ സ്ഥാപനങ്ങളോട് രാഷ്ട്രീയ പകപോക്കല്‍ നയം സ്വീകരിച്ചത് അംഗീകരിക്കാനാവില്ലെന്നും അവര്‍ പറഞ്ഞു. മെഡിക്കല്‍ കോളജിന് തുക വകയിരുത്താത്തത് ജില്ലയിലെ ജനങ്ങളോട് അനീതിയാണെന്ന് യൂത്ത് ലീഗ് ജില്ലാ പ്രസിഡന്റ് യഹ്‌യാഖാന്‍ തലക്കല്‍ ജനറല്‍ സെക്രട്ടറി പി. ഇസ്മായില്‍ എന്നിവര്‍ പറഞ്ഞു. ഭരണപക്ഷത്തിരുന്ന് പോലും മെഡിക്കല്‍ കോളജിനായി യൂത്ത് ലീഗ് സെക്രട്ടറിയേറ്റിലടക്കം സമരം നടത്തിയിരുന്നു. തെരഞ്ഞെടുപ്പ് സമയത്ത് എവിടെ മെഡിക്കല്‍ കോളജെന്ന് അന്വേഷിച്ച ഡി.വൈ.എഫ്.ഐക്ക് ഇപ്പോഴെന്തു പറയാനുണ്ടെന്നും നേതാക്കള്‍ ചോദിച്ചു. വിദ്യാഭ്യാസ രംഗത്ത് കഴിഞ്ഞ അഞ്ചുവര്‍ഷം യു.ഡി.എഫ് ജില്ലയില്‍ നടപ്പാക്കിയ വികസന പദ്ധതികളുടെ കടക്കല്‍ കത്തിവെക്കുന്നതായി ബജറ്റെന്ന് എം.എസ്.എഫ് ജില്ലാ പ്രസിഡന്റ് എം.പി നവാസ്, ജനറല്‍ സെക്രട്ടറി റിയാസ് കല്ലുവയല്‍ എന്നിവര്‍ കുറ്റപ്പെടുത്തി.