ഐസ്വാള്‍: റെലഗേഷന്‍ ഒഴിവാക്കാനുള്ള അവസാന മത്സരത്തിലും പരാജയം രുചിച്ചതോടെ ഷില്ലോങ് ലജോങ് ഐലീഗില്‍ നിന്ന് പുറത്തേക്ക്. ഇന്നലെ നടന്ന മത്സരത്തില്‍ 4-1 എന്ന സ്‌കോറിന് ഐസ്വാള്‍ എഫ്.സിയോടാണ് ലജോങ് പരാജയപ്പെട്ടത്. ലജോങിന് റെലഗേഷന്‍ ഒഴിവാക്കാനുള്ള അവസാന മത്സരമായിരുന്ന ഇന്നലത്തേത്. എന്നാല്‍ ഇതില്‍ വന്‍ പരാജയം ഏറ്റുവാങ്ങിയതോടെയാണ് ടീമിന് പുറത്തേക്കുള്ള വഴി തെളിഞ്ഞത്.

ഒന്ന് പൊരുതി നോക്കാന്‍ പോലുമാവാതെയായിരുന്നു ലജോങ്ങിന്റെ കീഴടങ്ങല്‍. ഐസ്വാളിന് വേണ്ടി ക്രോമ ഇരട്ട ഗോള്‍ നേടി. 93-ാം മിനുട്ടില്‍ ലിങ്‌ദോയാണ് ലജോങിന്റെ ആശ്വാസ ഗോള്‍ നേടിയത്. അവസാന രണ്ട് മത്സരങ്ങളും വിജയിച്ചാല്‍ ലജോങിന് ചെറിയെ പ്രതീക്ഷയെങ്കിലും ബാക്കിയുണ്ടായിരുന്നു.
ഇന്നലത്തെ പരാജയത്തോടെ ഈ പ്രതീക്ഷയും നഷ്ടപ്പെടുകയായിരുന്നു. വെള്ളിയാഴ്ച മോഹന്‍ബഗാനുമായിട്ടാണ് ലജോങിന്റെ അവസാന മത്സരം.