മുംബൈ: പാസ്‌പോര്‍ട്ട് റദ്ദാക്കിയ നടപടി പിന്‍വലിക്കണമെന്നടക്കമുള്ള ആവശ്യമുന്നയിച്ച് സാക്കിര്‍ നായിക്ക് നല്‍കിയ ഹരജി ബോംബെ ഹൈക്കോടതി തള്ളി. അന്വേഷണ ഏജന്‍സിയെ സഹായിക്കാനോ താല്‍പര്യം കാണിക്കുന്നില്ലെന്നു നിരീക്ഷിച്ചാണ് കോടതിയുടെ നടപടി.

അന്വേഷണ റിപ്പോര്‍ട്ട് സമര്‍പ്പിക്കാന്‍ എന്‍.ഐ.എയോടും (ദേശീയ അന്വേഷണ ഏജന്‍സി) ഇ.ഡിയോടും (എന്‍ഫോഴ്‌സ്‌മെന്റ് ഡയരക്ടറേറ്റ്) നിര്‍ദേശിക്കണമെന്നാവശ്യപ്പെട്ടു കൂടിയാണ് സാക്കിര്‍ നായിക്ക് ഹരജി സമര്‍പ്പിച്ചത്. പാസ്‌പോര്‍ട്ട് റദ്ദാക്കിയ നടപടി പിന്‍വലിക്കണമെന്ന് വിദേശകാര്യ മന്ത്രാലയത്തോട് നിര്‍ദേശിക്കണമെന്നും ഹരജിയില്‍ ആവശ്യപ്പെട്ടു.

എന്നാല്‍ പാസ്‌പോര്‍ട്ട് റദ്ദാക്കിയതിനെതിരെ ഉത്തരവ് പുറപ്പെടുവിക്കാനാവില്ലെന്നും അതിനായി പ്രത്യേകം ഹരജി സമര്‍പ്പിക്കണമെന്നും കോടതി നിര്‍ദേശിച്ചു. അന്വേഷണ ഏജന്‍സിക്കു മുന്നില്‍ സ്വയം ഹാജരാവാന്‍ പോലും സാക്കിര്‍ നായിക്ക് തയ്യാറായില്ലെന്ന് കോടതി നിരീക്ഷിച്ചു.

2016 ല്‍ ബംഗ്ലാദേശില്‍ 22 പേരുടെ മരണത്തിനിടയാക്കിയ സ്‌ഫോടനവുമായി ബന്ധപ്പെട്ടാണ് സാക്കിര്‍ നായിക്കിനെതിരെ കേസെടുത്തത്. നായിക്കിന്റെ ഉടമസ്ഥതയിലുള്ള പീസ് ടി.വിയില്‍ നിന്ന് പ്രചോദനം ഉള്‍ക്കൊണ്ടുവെന്ന് കേസിലെ പ്രതികള്‍ മൊഴിനല്‍കിയെന്നാണ് ആരോപണം. തുടര്‍ന്ന് നായിക്കിന്റെ ഇസ്‌ലാമിക് റിസര്‍ച്ച് ഫൗണ്ടേഷന്‍ ആസ്തികള്‍ പിടിച്ചെടുക്കുകയും നായിക്കിനെതിരെ യു.എ.പി.എ ചുമത്തി കേസെടുക്കുകയും ചെയ്തു.

ഇപ്പോള്‍ വിദേശത്തുള്ള സാക്കിര്‍ നായിക്കിനെതിരെ എന്‍.ഐ.എയും ഇ.ഡിയും സമന്‍സ് അയച്ചെങ്കിലും ഇതുവരെ ഹാജരായിട്ടില്ല.