ദോഹ: പ്രിയപ്പെട്ടവര്‍ ശസ്ത്രക്രിയാ മുറിയില്‍ കിടക്കുമ്പോള്‍ പുറത്ത് ആശങ്കയോടെ കാത്തിരിക്കുന്ന ബന്ധുക്കള്‍ക്ക് അപ്പപ്പോള്‍ വിവരങ്ങള്‍ അറിയിക്കാന്‍ ഹമദ് മെഡിക്കല്‍ കോര്‍പറേഷന്‍ സംവിധാനമൊരുക്കുന്നു. സര്‍ജറി വെയ്റ്റിങ് റൂമില്‍ ഇന്‍ഫര്‍മേഷന്‍ സ്‌ക്രീന്‍ സ്ഥാപിക്കാനാണ് പദ്ധതിയെന്ന് അല്‍ശര്‍ഖ് റിപോര്‍ട്ട് ചെയ്തു.

രോഗികളുടെ പേരിനു പകരം ബന്ധുക്കള്‍ക്കു മാത്രം അറിയുന്ന കോഡ് നെയിമുകളായിരിക്കും സ്‌ക്രീനില്‍ ഉപയോഗിക്കുക. സര്‍ജറിക്കുള്ള വിവിധ ഘട്ടങ്ങള്‍ക്കനുസരിച്ച് കളര്‍ കോഡിലായിരിക്കും വിവരങ്ങള്‍ അറിയിക്കുക. രോഗിയെ ശസ്ത്രിക്രിയക്കായി ഒരുക്കുന്നു, ഓപറേഷന്‍ മുറിയില്‍ പ്രവേശിപ്പിക്കുന്നു, ശസ്ത്രക്രിയക്ക് ശേഷം ഇന്റന്‍സീവ് കെയറിലേക്കോ വാര്‍ഡിലേക്കോ മാറ്റുന്നു തുടങ്ങിയ വിവരങ്ങള്‍ സ്‌ക്രീന്‍ വഴി അപ്പപ്പോള്‍ അറിയാന്‍ കഴിയും.

ശസ്ത്രക്രിയാ നടപടികള്‍ സംബന്ധിച്ച് ബന്ധുക്കള്‍ അപ്പപ്പോള്‍ ടെക്സ്റ്റ് മെസേജുകള്‍ വഴി അറിയിക്കുന്നതിനുള്ള സംവിധാനം ഒരുക്കാനും ഹമദിന് പദ്ധതിയുണ്ട്.