പട്ടാമ്പി: നിളയെ സംരക്ഷിക്കണമെന്ന് ആവശ്യപ്പെട്ട് ഡി.വൈ.എഫ്.ഐ പട്ടാമ്പി മുനിസിപ്പല്‍ കമ്മിറ്റിയുടെ നേതൃത്വത്തില്‍ അധികൃതര്‍ക്ക് നിവേദനം നല്‍കി. നഗരസഭാ ചെയര്‍മാന്‍, പട്ടാമ്പി തഹസില്‍ദാര്‍, പട്ടാമ്പി സബ് ഇന്‍സ്‌പെക്ടര്‍ എന്നിവര്‍ക്കാണ് ഡി.വൈ.എഫ്.ഐ പട്ടാമ്പി ബ്ലോക്ക് സെക്രട്ടറി ടി. ഷാജിയുടെ നേതൃത്വത്തില്‍ നിവേദനം നല്‍കിയത്. വര്‍ഷങ്ങളായി തുടരുന്ന നിയമലംഘനങ്ങള്‍ ഭാരതപ്പുഴയെ നശീകരണത്തിലെക്ക് തള്ളിവിട്ടിരിക്കുകയാണ്. പട്ടാമ്പി നഗരത്തിലെ മാലിന്യ പ്രശ്‌നങ്ങളും പരിസ്ഥിതിക്ക് ഏറെ വെല്ലുവിളി സൃഷ്ടിക്കുന്നുണ്ട്. പട്ടാമ്പിയുടെ മുഖ്യ ജലസ്രോതസ്സാണ് നിള. നഗരത്തിലുള്ള വിവിധ ഹോട്ടലുകള്‍, ലോഡ്ജുകള്‍, അറവുശാലകള്‍, വര്‍ക്ക്‌ഷോപ്പുകള്‍, സ്വകാര്യ ആശുപത്രി, കംഫര്‍ട്ട് സ്റ്റേഷന്‍ എന്നിവയില്‍നിന്നുള്ള മാലിന്യങ്ങളത്രയും എത്തിചേരുന്നത് നിളയിലാണ്.