മുംബൈ: മുംബൈയിലെ ആശുപത്രിയില്‍ കൊവിഡ് വാര്‍ഡില്‍ ചികിത്സയില്‍ കഴിയുന്ന രോഗികള്‍ക്കിടയിലായി കൊവിഡ് ബാധിച്ച് മരണപ്പെട്ടവരുടെ മൃതദേഹങ്ങളും കിടത്തിയെന്ന് കാണിക്കുന്ന ദൃശ്യങ്ങള്‍ പുറത്ത്.
ബി.ജെ.പി എം.എല്‍.എ നിതീഷ് റാണെയാണ് ഇതിന്റെ ദൃശ്യങ്ങള്‍ ട്വിറ്ററില്‍ പങ്കുവച്ചത്. മുംബൈ കോര്‍പറേഷന്‍ നടത്തുന്ന സയന്‍ ആശുപത്രിയിലേതാണ് ദൃശ്യങ്ങള്‍.
കൊവിഡ് ബാധിച്ച് മരിച്ച ആറുപേരുടെ മൃതദേഹങ്ങള്‍ വാര്‍ഡില്‍ തന്നെ കിടത്തിയിരിക്കുന്നതാണ് ദൃശ്യങ്ങളില്‍ കാണുന്നത്. അടുത്തടുത്തായുള്ള കട്ടിലുകളില്‍ ചികിത്സയില്‍ കഴിയുന്ന രോഗികളെയും കാണാം. കറുത്ത പ്ലാസ്റ്റിക് കവറിട്ട് പൊതിഞ്ഞ് വാര്‍ഡിലെ കട്ടിലില്‍ കിടത്തിയ നിലയിലാണ് മൃതദേഹങ്ങള്‍. ചില മൃതദേഹങ്ങള്‍ തുണിയിട്ട് മൂടിയിട്ടുമുണ്ട്.
മൃതദേഹങ്ങള്‍ നീക്കംചെയ്യാന്‍ പോലും ആശുപത്രി അധികൃതര്‍ തയാറാകുന്നില്ലെന്ന ആരോപണവുമായാണ് ബി.ജെ.പി എം.എല്‍.എ എത്തിയത്. ദൃശ്യങ്ങള്‍ പകര്‍ത്തിയത് തന്റെ സഹപ്രവര്‍ത്തകനാണെന്നും ആശുപത്രിയില്‍ ചില കാര്യങ്ങള്‍ക്കായി എത്തിയ അദ്ദേഹമാണ് ഈ ദൃശ്യങ്ങള്‍ കണ്ടതെന്നും എം.എല്‍.എ റാണെ പ്രതികരിച്ചു.
എന്നാല്‍ ഗുരുതരമായ ആരോപണം ഉയര്‍ന്നിട്ടും വിഷയത്തില്‍ പ്രതികരിക്കാന്‍ എല്‍.ടി.എം.ജി സയന്‍ ആശുപത്രി അധികൃതരോ ബ്രിഹം മുംബൈ മുനിസിപ്പല്‍ കോര്‍പറേഷനോ തയാറായിട്ടില്ല.
കൊവിഡ് വാര്‍ഡായിട്ടുപോലും യാതൊരു സുരക്ഷാ സംവിധാനങ്ങളും ഇല്ലാതെ കൊവിഡ് രോഗികളുടെ ബന്ധുക്കള്‍ മുറിയില്‍ കയറിയിറങ്ങുന്നതും വിഡിയോയില്‍ കാണാം. ഒരു രോഗിക്കരികില്‍ അവരുടെ ബന്ധു കട്ടിലിന് സമീപം നില്‍ക്കുന്നതും വിഡിയോയില്‍ വ്യക്തമാണ്.
34 പേരാണ് സംസ്ഥാനത്ത് ഇന്നലെ കൊവിഡ് ബാധിച്ച് മരണപ്പെട്ടത്. 16,758 കൊവിഡ് കേസുകളാണ് മഹാരാഷ്ട്രയില്‍ ഇതുവരെ റിപ്പോര്‍ട്ട് ചെയ്യപ്പെട്ടത്. 651 പേര്‍ മരണപ്പെടുകയും ചെയ്തു.