ജിദ്ദ: യന്ത്രത്തകരാര്‍ മൂലം റിയാദില്‍ നിന്നുള്ള എയര്‍ ഇന്ത്യാ കൊച്ചി വിമാനം മൂന്നുമണിക്കൂര്‍ വൈകി. ഞായറാഴ്ച ഉച്ചകഴിഞ്ഞ് 3.50ന് പുറപ്പെടേണ്ടിയിരുന്ന എ.ഐ 924 വിമാനമാണ് വൈകിട്ട് 7.30ന് പുറപ്പെട്ടത്.

142 യാത്രക്കാരും ബോര്‍ഡിങ് പാസ് കിട്ടിയ ശേഷമാണ് വിമാനം വൈകുമെന്ന വിവരം അറിഞ്ഞത്. മുംബൈയില്‍നിന്ന് വരുന്ന വിമാനമാണ് കൊച്ചിയിലേക്ക് പോകേണ്ടത്. കൃത്യസമയത്ത് തന്നെ മുംബൈയില്‍നിന്ന് വിമാനം പുറപ്പെട്ടിരുന്നു. എന്നാല്‍ 25 മിനിട്ടിന് ശേഷം എന്‍ജിന്‍ തകരാര്‍ ശ്രദ്ധയില്‍പ്പെട്ടതിനെ തുടര്‍ന്ന് മുംബൈ വിമാനത്താവളത്തില്‍ തിരിച്ചിറക്കുകയായിരുന്നു. യന്ത്രത്തകരാറാണ് വൈകാന്‍ കാരണമെന്ന് എയര്‍ ഇന്ത്യാ റിയാദ് എയര്‍പോര്‍ട്ട് ഡ്യൂട്ടി മാനേജര്‍ സിറാജുദ്ദീന്‍ പരപ്പനങ്ങാടി പറഞ്ഞു.