കൊച്ചി: മത്സ്യക്കയറ്റുമതിയുടെ മറവില്‍ കര്‍ണാടകയില്‍നിന്ന് കേരളത്തിലേക്ക് വന്‍തോതില്‍ മദ്യം കടത്തിയ രണ്ടുപേരെ ആലുവ റേഞ്ച് എക്‌സൈസ് പിടികൂടി. ചേര്‍ത്തല തണ്ണീര്‍മുക്കം പാലക്കവെളി വീട്ടില്‍ ജോഷിലാല്‍, ചേര്‍ത്തല പുത്തനമ്പലം കരയില്‍ കുന്നത്ത്പറമ്പില്‍ വീട്ടില്‍ ഉണ്ണികൃഷ്ണന്‍ എന്നിവരെയാണ് ഷാഡോ സംഘം കസ്റ്റഡിയില്‍ എടുത്തത്.
ഇവരില്‍നിന്ന് കര്‍ണാടകയില്‍ മാത്രം ഉപയോഗിക്കാവുന്ന 10 ലിറ്ററോളം മദ്യം കണ്ടെടുത്തു. മദ്യം കടത്താന്‍ ഉപയോഗിച്ച ഇന്‍സുലേറ്റര്‍ വാനും എക്‌സൈസ് കസ്റ്റഡിയിലെടുത്തിട്ടുണ്ട്. കര്‍ണാടകയില്‍നിന്ന് ഏജന്റുമാര്‍ വഴി കടത്തുന്ന മദ്യം നാലിരട്ടി വിലയ്ക്കാണ് കേരളത്തില്‍ വില്‍ക്കുന്നതെന്ന് ചോദ്യം ചെയ്യലില്‍ വ്യക്തമായി. മുന്‍കൂട്ടിയുള്ള ഓര്‍ഡര്‍ പ്രകാരമാണ് ഇവര്‍ മദ്യം എത്തിച്ചു നല്‍കിയിരുന്നത്.
വ്യത്യസ്ത വാഹനങ്ങളില്‍ ഓരോ പ്രാവശ്യവും ഇരുവരും ബംഗളൂരുവിലേക്ക് പോകുന്നതിനാല്‍ മദ്യക്കടത്ത് കണ്ടുപിടിക്കുക ദുഷ്‌കരമായിരുന്നു. ഷാഡോ ടീം അംഗങ്ങളുടെ ദിവസങ്ങള്‍ നീണ്ട പരിശ്രമങ്ങള്‍ക്കൊടുവില്‍ ഇവര്‍ പാലക്കാട്, തൃശൂര്‍ എന്നിവിടങ്ങളില്‍ മദ്യം ഇറക്കിയശേഷം ആലുവ ഭാഗത്തേക്ക് വരുന്നുണ്ടെന്ന രഹസ്യവിവരത്തെ തുടര്‍ന്ന് നെടുമ്പാശേരി എയര്‍പോര്‍ട്ടിന് സമീപത്തുവച്ച് വാഹനം പിന്തുടര്‍ന്നാണ് പിടികൂടിയത്.
കര്‍ണാടകയില്‍ മാത്രം വില്‍പന നടത്തിവരുന്ന മദ്യം കൈവശംവയ്ക്കുന്നതും കേരളത്തില്‍ വില്‍പന നടത്തുന്നതും 10 വര്‍ഷം വരെ തടവും ഒരു ലക്ഷം രൂപ പിഴയും ലഭിക്കാവുന്ന കുറ്റമാണ്. ഇന്‍സ്‌പെക്ടര്‍ ടി.കെ ഗോപിയുടെ നേതൃതത്തില്‍ പ്രിവന്റീവ് ഓഫിസര്‍ എം.കെ ഷാജി, ഷാഡോ ടീമംഗങ്ങളായ എന്‍.ഡി ടോമി, എന്‍.ജി അജിത്കുമാര്‍, സിവില്‍ എക്‌സൈസ് ഓഫിസര്‍ ഗിരീഷ് കൃഷ്ണന്‍ എന്നിവരും അന്വേഷണ സംഘത്തില്‍ ഉണ്ടായിരുന്നു.