കാഞ്ഞങ്ങാട് : ഇതര സംസ്ഥാന തൊഴിലാളിയായ സ്ത്രീയെ പീഡിപ്പിക്കാന്‍ ശ്രമിച്ചതിന് കസ്റ്റഡിയിലെടുത്ത യുവാവ് പൊലിസുകാരന്റെ തലക്കടിച്ച് പരുക്കേല്‍പ്പിച്ചു. ഇന്നലെ രാവിലെ കാഞ്ഞങ്ങാട് റെയില്‍വേ സ്റ്റേഷനിലാണ് സംഭവം. ഒഡിഷ സ്വദേശി സഫേദ് കുമാര്‍ പ്രതാപ് (30 ) ആണ് റെയില്‍വേ സ്‌റ്റേഷനില്‍ ഡ്യൂട്ടിയിലുണ്ടായിരുന്ന വിനീഷ് എന്ന പൊലിസുകാരന്റെ തലയില്‍ വടി കൊണ്ട് അടിച്ചു പരുക്കേല്‍പ്പിച്ചത്. 

റെയില്‍വേ സ്റ്റേഷനില്‍ ഇരിക്കുകയായിരുന്ന യുവതിയെ ശല്യപ്പെടുത്തുകയായിരുന്ന സഫേദ് കുമാറിനെ തടയാന്‍ ചെന്ന യാത്രക്കാര്‍ക്ക് നേരെ ഇയാള്‍ അക്രമത്തിന്ന് മുതിര്‍ന്നിരുന്നു. ഇത് കണ്ട് റെയില്‍വേ സ്റ്റേഷനില്‍ ഡ്യൂട്ടിയിലായിരുന്ന വിനീഷ് ഇയാളെ കസ്റ്റഡിയിലെടുക്കുകയായിരുന്നു.
സ്റ്റേഷന് പുറത്തുള്ള പൊലിസ് എയ്ഡ് പോസ്റ്റിലെത്തിച്ചപ്പോഴാണ് ഇയാള്‍ വടി കൊണ്ട് വിനീഷിന്റെ തലക്കടിച്ചത്. ജില്ലാ ആശുപത്രിയില്‍ പ്രവേശിപ്പിച്ച വിനീഷിന്റെ തലക്ക് രണ്ടു തുന്നിട്ടുണ്ട് . ഔദ്യോഗിക കൃത്യനിര്‍വഹണം തടസപ്പെടുത്തല്‍, വധശ്രമം എന്നീ വകുപ്പുകള്‍ ചേര്‍ത്ത് പ്രതിക്കെതിരേ ഹൊസ്ദുര്‍ഗ് പൊലിസ് കേസെടുത്തു.ഇയാളെ കോടതിയില്‍ ഹാജരാക്കി.