നിലമ്പൂര്‍: വര്‍ഷങ്ങളുടെ നീണ്ട മുറവിളിക്കൊടുവില്‍ നിലമ്പൂര്‍ ബൈപാസ് യാഥാര്‍ഥ്യമാവുന്നു. ഇതുവരെയുള്ള തെരഞ്ഞെടുപ്പുകളിലെ പ്രധാന വിഷയങ്ങളിലൊന്നായിരുന്നു നിലമ്പൂര്‍ ബൈപാസ്. എല്ലാ ബജറ്റിലും അനുവദിക്കുന്ന നാമമാത്രമായ തുകയാണ് ഇത്തവണയും ബജറ്റില്‍ നിലമ്പൂര്‍ നിവാസികള്‍ പ്രതീക്ഷിച്ചത്. എല്‍.ഡി.എഫ് സര്‍ക്കാറിന്റെ കന്നി ബജറ്റില്‍ അനുവദിച്ചതാകട്ടെ 100 കോടി രൂപയും. നിലമ്പൂരിലെ അതിരൂക്ഷമായ ഗതാഗത കുരുക്കിനു ശാശ്വത പരിഹാരമെന്ന നിലയിലാണു നിലമ്പൂര്‍ ബൈപാസിനു മുറവിളി കൂട്ടിയത്. സ്ഥലം ഏറ്റെടുക്കലും പ്രശ്‌നങ്ങളുമായി ബൈപാസ് നിര്‍മാണം കടലാസില്‍ തന്നെ ഒതുങ്ങിയിരുന്നു. ഇക്കഴിഞ്ഞ തെരഞ്ഞെടുപ്പിനു മുന്നോടിയായാണു റോഡ് പ്രവൃത്തിയുടെ ഉദ്ഘാടനം നിര്‍വഹിക്കപ്പെട്ടത്.
നിലമ്പൂര്‍ ജ്യോതിപ്പടി മുതല്‍ വെളിയന്തോട് വരെയുള്ള ആറു കിലോമീറ്ററോളം ദൈര്‍ഘ്യത്തിലുള്ള റോഡ് വരുന്നതോടെ നിലമ്പൂര്‍ ടൗണിലെ വാഹനങ്ങളുടെ തിരക്കു നിയന്ത്രിക്കപ്പെടും. 2006ല്‍ ഇടതുപക്ഷ സര്‍ക്കാര്‍ 16 കോടി രൂപയാണ് ആദ്യം അനുവദിച്ചിരുന്നു. പിന്നീട് വന്ന യുഡിഎഫ് സര്‍ക്കാര്‍ മറ്റൊരു 16 കോടിയും അനുവദിച്ചിരുന്നു. എന്നാല്‍ സ്ഥലം വിട്ടുകൊടുക്കുന്നതിനു നഷ്ടപരിഹാര തുകയിലെ ഭിന്നത മൂലം ചിലര്‍ കോടതിയെ സമീപിച്ചു. ഇതോടെ വര്‍ഷങ്ങളോളം ബൈപാസിന്റെ നിര്‍മാണവുമായി ബന്ധപ്പെട്ട് ഒരു പ്രവൃത്തിയും നടന്നില്ല. ഒന്നാം ഘട്ടമായി നിലമ്പൂര്‍ ജ്യോതിപ്പടി മുതല്‍ വീട്ടിക്കുത്ത് ജങ്ഷന്‍ വരെയുള്ള പ്രദേശത്തെ ബൈപ്പാസിനായി സ്ഥലം വിട്ടുനല്‍കുന്ന ഉടമകള്‍ക്ക് നഷ്ടപരിഹാരം നല്‍കാന്‍ നടപടികളായിരുന്നുവെങ്കിലും വില നിര്‍ണയത്തിലെ അപാകത സംബന്ധിച്ച് സംസ്ഥാന ലാന്റ് ബോര്‍ഡ് കമ്മീഷന്‍ ഫയല്‍ തിരിച്ചയച്ചിരിക്കുകയാണ്.
നൂറുകോടി രൂപ അനുവദിച്ചതോട ഉടന്‍ ബൈപാസ് നിര്‍മാണം പൂര്‍ത്തിയാക്കാനാവുമെന്നാണ് പ്രതീക്ഷ. കൂടാത നിലമ്പൂരില്‍ മള്‍ട്ടി പര്‍പ്പസ് ഇന്‍ഡോര്‍ സ്‌റ്റേഡിയത്തിന് അഞ്ചുകോടി രൂപയും അനുവദിച്ചിട്ടുണ്ട്. ജില്ലയില്‍ ഒരു സ്‌റ്റേഡിയത്തിനാണ് ബജറ്റില്‍ തുക വകയിരുത്തിയിട്ടുള്ളത്.