കുറ്റ്യാടി: വേളം പഞ്ചായത്തിലെ പെരുവയലില്‍ വീട്ടുമുറ്റത്ത് നിര്‍ത്തിയിട്ട ബൈക്ക് കത്തി നശിച്ച നിലയില്‍. ചേനായി കടവിന് സമീപം പരക്കാട്ട് അബുവിന്റെ ബൈക്കാണ് ദുരൂഹ സാഹചര്യത്തില്‍ കത്തി നശിച്ചത്.
തിങ്കളാഴ്ച അര്‍ധരാത്രിയോടെയാണ് സംഭവം. അസമയത്ത് വീട്ടുമുറ്റത്തു നിന്നു തീ ഉയരുന്നത് കണ്ടു വീട്ടുകാരും പരിസരവാസികളും ഓടിയെത്തി തീ അണയ്ക്കാന്‍ ശ്രമിച്ചെങ്കിലും ബൈക്ക് പൂര്‍ണമായും കത്തി നശിച്ചു. വീടിന്റെ ജനല്‍, വൈദ്യുതി സര്‍വിസ് വയര്‍ എന്നിവയ്ക്കും തീപിടിച്ചു. കുറ്റ്യാടി പൊലിസില്‍ പരാതി നല്‍കിയതിനെ തുടര്‍ന്ന് പൊലിസും ഡോഗ് സ്‌ക്വാഡും സംഭവസ്ഥലം സന്ദര്‍ശിച്ച് അന്വേഷണം ആരംഭിച്ചു.