തിരുവനന്തപുരം:  ജില്ലയിലെ ചില്ലറ കച്ചവടക്കാര്‍ക്ക് കഞ്ചാവ് വിതരണം ചെയ്യുന്ന രണ്ടു പേരെ രണ്ടുകിലോ കഞ്ചാവുമായി പിടികൂടി.  പൊന്നു മംഗലം വയലില്‍ വീട്ടില്‍  സിയാദ് ( 29 ), കാരയ്ക്കാ മണ്ഡപം ചെമുണ്ണുവിള വീട്ടില്‍  സിയാദ് (24) എന്നിവരാണ് നേമം റയില്‍വേ സ്‌റ്റേഷന് സമീപത്തു നിന്നും സിറ്റി ഷാഡോ പൊലിസിന്റെ  പിടിയിലായത്.
കഴിഞ്ഞ കുറച്ച് മാസങ്ങള്‍ക്കിടെ പിടിയിലായ  ചില്ലറ വില്‍പ്പനക്കാരില്‍ നിന്നും കിട്ടിയ വിവരത്തിന്റെ അടിസ്ഥാനത്തില്‍ പൊലിസ്  നടത്തിയ തന്ത്രപരമായ നീക്കത്തിലാണ് ഇവര്‍ പിടിയിലായത്.  
തമിഴ്‌നാട്ടില്‍ നിന്നും കഞ്ചാവ് എത്തിക്കുന്ന ഇവര്‍ ഇവിടുത്തെ ചില്ലറ വില്‍പ്പനക്കാര്‍ക്ക് കാല്‍ കിലോ, അര കിലോ എന്നിങ്ങനെ അളവിലാണ് വിറ്റിരുന്നത്. അന്‍പത് ഗ്രാമിന് ഏകദേശം നാലായിരം രൂപയ്ക്ക് മേല്‍ തുക ഈടാക്കിയിരുന്നു.പ്രതികളില്‍ നിന്നും  ജില്ലയിലെ മറ്റു ചെറുകിട കച്ചവടക്കാരുടെ വിവരങ്ങളും പൊലിസിന്  ലഭിച്ചിട്ടുണ്ട്. വരും ദിവസങ്ങളില്‍ അവരെയും പിടികൂടുമെന്ന് സിറ്റി പൊലിസ് കമ്മിഷണര്‍ സ്പര്‍ജന്‍ കുമാര്‍ അെറിയിച്ചു.
കണ്‍ട്രോള്‍ റൂം അസി: കമ്മീഷണര്‍ വി.സുരേഷ് കുമാര്‍ ,നേമം എസ്.ഐ.സമ്പത്ത്, ഷാഡോ എസ്.ഐ.സുനില്‍ ലാല്‍, സിറ്റി ഷാഡോ ടീമംഗങ്ങള്‍ എന്നിവരടങ്ങിയ സംഘമാണ് പ്രതികളെ പിടികൂടിയത്.