വാഷിങ്ടണ്‍: പ്രതിഷേധപ്രകടനത്തിനിടയിലേക്ക് നിറയൊഴിച്ച് അഞ്ചു പേരെ വധിച്ച അക്രമിയെ പൊലിസ് തിരിച്ചറിഞ്ഞു. മുന്‍ യു.എസ് സൈനികനായ മിക്ക സേവ്യര്‍ ജോണ്‍സണ്‍ എന്ന 25 കാരനാണിയാളെന്ന് പൊലിസ് പറഞ്ഞു.

അഫ്ഗാനിസ്ഥാനിലെ യു.എസ് സൈനിക ട്രൂപ്പില്‍ ജോണ്‍സണുമുണ്ടായിരുന്നു. ഇദ്ദേഹത്തിനെതിരെ മുന്‍പ് ക്രിമിനല്‍ കേസുകളൊന്നുമില്ലെന്നും തീവ്രവാദി ഗ്രൂപ്പുകളുമായി ബന്ധമില്ലെന്നും പൊലിസ് അറിയിച്ചു.

കറുത്ത വര്‍ഗക്കാരനെ പൊലിസ് കൊലപ്പെടുത്തിയതില്‍ പ്രതിഷേധിച്ച് ഡല്ലാസ് നഗരത്തില്‍ സമാധാനപരമായി നടത്തിയ പ്രകടനത്തിനു നേരെയാണ് ജോണ്‍സണ്‍ വെടിവച്ചത്. വെടിവയ്പ്പില്‍ അഞ്ചു പൊലിസുകാര്‍ കൊല്ലപ്പെട്ടിരുന്നു. അക്രമിയെ സംഭവസ്ഥലത്തു തന്നെ പൊലിസ് വെടിവച്ചിട്ടു.

ഏഴു പൊലിസുകാര്‍ക്കും രണ്ട് സാധാരണക്കാര്‍ക്കും പരുക്കേറ്റിട്ടുമുണ്ട്. ടെക്‌സാസിലെ മൂന്നാമത്തെ വലിയ നഗരമാണ് ഡല്ലാസ്.