റിയാദ്: കൊവിഡ്-19 വൈറസ് ബാധ വ്യാപനത്തെ തുടർന്ന് വിമാന സർവ്വീസ് നിലച്ചതോടെ മോർച്ചറികളിൽ കെട്ടിക്കിടന്ന മൃതുദേഹങ്ങൾക്ക് ഒടുവിൽ മോചനമായിത്തുടങ്ങി. സഊദിയിൽ നിന്ന് ഇന്ന് മുതൽ വീണ്ടും മലയാളികളുടെ മൃതുദേഹങ്ങൾ നാട്ടിലേക്കയച്ചു. ആഴ്ചകൾ നീണ്ട കാത്തിരിപ്പുകൾക്കൊടുവിലാണ് മൂന്ന് മലയാളികളുടെ മൃതദേഹം ഇന്നത്തെ ദമാമിൽ നിന്നുള്ള എമിറേറ്റ്സ് കാർഗോ  വിമാനത്തിൽ അയച്ചത്. സാമൂഹ്യ പ്രവര്‍ത്തകന്‍ നാസ് വക്കത്തിന്റെ നേതൃത്വത്തിലാണ് മൃതദേഹങ്ങള്‍ നടപടികള്‍ പൂര്‍ത്തിയാക്കി നാട്ടിലേക്കയച്ചത്.

       പലക്കാട് പട്ടാമ്പി സ്വദേശി ബാലകൃഷണന്‍, കോങ്ങാട് സ്വദേശി വേലായുധന്‍ ആണ്ടി, ആലപ്പുഴ ഹരിപ്പാട് സ്വദേശി മോഹന്‍ദാസ് എന്നിവരുടെ മൃതദേഹങ്ങളാണ് ഇന്ന് എമിറേറ്റ്‌സിന്റെ കാര്‍ഗോ വിമാനത്തില്‍ നെടുമ്പാശ്ശേരി വിമാനത്താവളത്തിലേക്ക് അയച്ചത്. അബുദാബിയിൽ നിന്നും കൊച്ചി വിമാനത്തിൽ മൃതദേഹം കൊച്ചിയിലെത്തും. കാര്‍ഗോ വിമാന സര്‍വീസുകളുടെ എണ്ണത്തിലെ കുറവും മൃതദേഹങ്ങള്‍ അയക്കുന്നതിന് കാലതാമസം നേരിടുന്നതായി ഈ രംഗത്തുള്ളവര്‍ പറയുന്നു.

       കൊവിഡ് പശ്ചാത്തലത്തിൽ വിമാന സർവീസ് മുടങ്ങിയതോടെ മോർച്ചറികളിൽ മൃതദേഹങ്ങൾ കുമിഞ്ഞു കൂടുന്ന വാർത്ത നേരത്തെ തന്നെ പുറത്ത് വന്നിരുന്നു. ഏതാനും മൃതദേഹങ്ങൾ ഇവിടെ ഖബറടക്കുകയും ചിലത് സാമൂഹ്യ പ്രവർത്തകരുടെ കഠിന ശ്രമ ഫലമായി ചില മൃതദേഹങ്ങൾ കാർഗോ വിമാനങ്ങൾ വഴി അയക്കുകയും ചെയ്തിരുന്നു. അതിനിടെ കാർഗോ വഴി മൃതദേഹങ്ങൾ വരുത്തുന്നതിന് കേന്ദ്ര സർക്കാർ അനുമതി നിഷേധിക്കുകയും ചെയ്തത് ഏറെ പ്രതിഷേധങ്ങൾക്കിടയാക്കിയിരുന്നു. ഇതേ തുടർന്ന് ഒടുവിൽ ഏതാനും ആഴ്ചകൾക്ക് മുമ്പ് കേന്ദ്ര സർക്കാർ വീണ്ടും കാർഗോ വിമാനം വഴി മൃതദേഹങ്ങൾ അനുമതി നൽകിയിരുന്നു. 

      സഊദിയിലെ വിവിധ ഭാഗങ്ങളിൽ നിന്നും ഇന്ത്യയിലേക്ക് കൊണ്ടുപോകാനായി  എഴുപതോളം മൃതദേഹങ്ങളാണ് കാത്തിരിക്കുന്നത്. റിയാദ്, ബുറൈദ, അല്‍റാസ്, കിഴക്കന്‍ പ്രവിശ്യ, വടക്കൻ പ്രവിശ്യ ഉൾപ്പെടെ വിവിധ ഭാഗങ്ങളിലെ ആശുപത്രി മോര്‍ച്ചറികളിലാണ് ഇത്രയധികം ഇന്ത്യക്കാരുടെ മൃതദേഹങ്ങള്‍ സൂക്ഷിച്ചിരിക്കുന്നത്. ഇന്ത്യക്കാരുട മൃതദേഹങ്ങള്‍ ഇനിയെങ്കിലും നാട്ടിലേക്ക് എത്തിക്കാനാകുമെന്ന പ്രതീക്ഷയിലാണ്. സഊദിയിൽ നിന്നും ഏകദേശം അറുപതോളം മൃതദേഹങ്ങളാണ്  മാസം തോറും ഇന്ത്യയുടെ വിവിധ ഭാഗങ്ങളിലേക്ക് കൊണ്ടുപോകാറുള്ളത്.