പെരിന്തല്‍മണ്ണ: ബജറ്റില്‍ വൈലോങ്ങര അങ്ങാടിപ്പുറം ഓരാടം പാലം മാനത്തുമംഗലം ബൈപ്പാസിന് പത്തു കോടിയനുവദിച്ചു. വൈലോങ്ങര അങ്ങാടിപ്പുറം ഓരാടം പാലം മാനത്തുമംഗലം ബൈപ്പാസിന് സര്‍ക്കാര്‍ പത്തു കോടി രൂപയനുവദിച്ചു. കഴിഞ്ഞ യു.ഡി.എഫ് സര്‍ക്കാരിന്റെ കാലത്ത് അഞ്ചു കോടി രൂപ അനുവദിച്ചിരുന്നു. ഇതോടെ പതിനഞ്ചു കോടി രൂപയോളം നിര്‍മാണ പ്രവര്‍ത്തികള്‍ക്കായി ലഭിക്കും. പെരിന്തല്‍മണ്ണ നഗരത്തിലെയും അങ്ങാടിപ്പുറത്തെയും ഗതാഗതകുരുക്ക് പരിഹരിക്കാനാണ് അങ്ങാടിപ്പുറം ഓരാടം പാലം മാനത്തുമംഗലം ബൈപ്പാസ് എന്ന ആശയം നിലവില്‍ വന്നത്. അങ്ങാടിപ്പുറം റെയില്‍വേ മേല്‍പ്പാലം യാഥാര്‍ഥ്യമായോടെ ഗതാഗതക്കുരുക്കിനു പരിഹാരമായെങ്കിലും പൂര്‍ണമായും കുരുക്ക് മാറിക്കിട്ടാന്‍ നിര്‍ദിഷ്ട ബൈപ്പാസ് കൊണ്ടണ്ട് സാധിക്കും. 25 ലക്ഷം രൂപ അനുവദിക്കണമെന്നാവശ്യപ്പട്ട് ടി.എ അഹമ്മദ് കബീര്‍ എം.എല്‍.എ നിവേദനം നല്‍കിയിരുന്നു. എന്നാല്‍ പത്തു കോടി സര്‍ക്കാര്‍ ബജറ്റില്‍ നീക്കി വെക്കുകയായിരുന്നു.
വൈലോങ്ങരയില്‍ നിന്നും ഓരാടംപാലം വഴി ബൈപ്പാസ് നിര്‍മിക്കുന്നതോട് കൂടി വളാഞ്ചേരി, കോട്ടക്കല്‍ ഭാഗത്തു നിന്ന് വരുന്ന വാഹനങ്ങള്‍ക്ക് അങ്ങാടിപ്പുറം ടൗണില്‍ പ്രവേശിക്കാതെ മഞ്ചേരി, മലപ്പുറം ഭാഗത്തേക്ക് പോകാനാകും. ഇതോടെ അങ്ങാടിപ്പുറത്തെ ഗതാഗതകുരുക്കിനും പരിഹാരമാകുമെന്നാണ് കണക്കു കൂട്ടല്‍. നിലവിലുള്ള മാനത്തുമംഗലം പൊന്ന്യാകുര്‍ശ്ശി ബൈപ്പാസിനോട് യോജിക്കുന്ന തരത്തിലാണ് പുതിയ ബൈപ്പാസ് നിര്‍മിക്കാന്‍ സ്ഥലം കണ്ടെണ്ടത്തുന്നത്.