കോലഴി: മൊബൈല്‍ ടവറുകളിലെ റേഡിയേഷന്‍ പ്രസരണം സംബന്ധിച്ച നിയമങ്ങള്‍ പാലിക്കുന്നുണ്ടോയെന്ന് സര്‍ക്കാരുകള്‍ ഉറപ്പുവരുത്തണമെന്ന് കൊച്ചിന്‍ ശാസ്ത്ര സാങ്കേതിക സര്‍വകലാശാലയിലെ അന്തരീക്ഷ ശാസ്ത്ര വിഭാഗം പ്രൊഫ. ഡോ.ബി. ചക്രപാണി ആവശ്യപ്പെട്ടു. കേരള ശാസ്ത്ര സാഹിത്യ പരിഷത്ത് ജില്ലാ സമ്മേളനത്തോടനുബന്ധിച്ച് 'മൊബൈല്‍ ഫോണിന്റെ കാണാച്ചരടുകള്‍ ' എന്ന വിഷയം അവതരിപ്പിക്കുകയായിരുന്നു അദ്ദേഹം. നിലവില്‍ റേഡിയേഷന്‍ പ്രസരണവും ഗുണനിലവാരവും സംബന്ധിച്ച് ഓരോ മൊബൈല്‍ ദാതാക്കള്‍ നല്‍കുന്ന വിവരം മാത്രമാണ് സര്‍ക്കാരിലുള്ളത്. ഇവ പരിശോധിക്കാന്‍ സര്‍ക്കാര്‍ തലത്തില്‍ നടപടി ഉണ്ടാകുന്നില്ലെന്ന് മാത്രമല്ല മൊബൈല്‍ ടവറുകള്‍ സംബന്ധിച്ച പഠനങ്ങളും കാര്യമായി നടക്കുന്നില്ല. അന്താരാഷ്ട്ര മാനദണ്ഡത്തിനുസൃതമായി മൊബൈല്‍ ടവറുകള്‍ക്ക് മീറ്റര്‍ സ്‌ക്വയറില്‍ 450 മെഗാ വാട്‌സ് എന്ന വികിരണ പ്രസരണ തോതാണ് നിശ്ചയിച്ചിട്ടുളളത്. മൊബൈല്‍ ദാതാക്കള്‍ക്ക് വേണ്ടി പഠനങ്ങള്‍ നടന്നിട്ടുണ്ടെന്ന് മാത്രമല്ല സര്‍ക്കാര്‍ തലത്തില്‍ വരെ മൊബൈല്‍ ദാതാക്കള്‍ക്ക് വേണ്ടി ഇടപെടലുണ്ടാകുന്നതായി ആരോപണമുണ്ട്. ഈ സാഹചര്യത്തില്‍ മൊബൈല്‍ ടവറുകള്‍ സംബന്ധിച്ച് കൃത്യമായ പഠനങ്ങളും നിലവിലെ നിയമങ്ങള്‍ പാലിക്കുന്നുണ്ടോയെന്ന് പരിശോധിക്കപ്പെടണമെന്നും അദ്ദേഹം പറഞ്ഞു.