ബോവിക്കാനം: പ്ലാന്റേഷന്‍ കോര്‍പറേഷന്റെ ആലൂര്‍ എസ്റ്റേറ്റില്‍ വീണ്ടും തീപിടിത്തം. കഴിഞ്ഞ ദിവസം തീപിടിത്തമുണ്ടായ മീത്തല്‍ ആലൂരിലെ മൈലാളംപാറ കുന്നിന്‍മുകളിലെ നാലേക്കറോളം റബര്‍ തോട്ടത്തിലാണ് ഇന്നലെ വിണ്ടും തീപിടിത്തമുണ്ടായത്. ഉച്ചയ്ക്ക് ഒന്നരയോടെയാണ് സംഭവം.
നാല് വര്‍ഷം പ്രായമായ ആയിരത്തോളം റബര്‍ തൈകളും അടിക്കാടുകളും കത്തിനശിച്ചു. നാട്ടുകാര്‍ വിവരമറിയിച്ചതിനെ തുടര്‍ന്ന് കാസര്‍കോട്ടുനിന്നെത്തിയ അഗ്‌നിരക്ഷാ സേനയും പ്ലാന്റേഷന്‍ ജീവനക്കാരും ചേര്‍ന്നാണ് തീയണച്ചത്.
കഴിഞ്ഞ ദിവസമുണ്ടായ തീപിടിത്തത്തില്‍ മരകുറ്റിയിലേ മറ്റോ ബാക്കിയുണ്ടായിരുന്ന കനലില്‍ നിന്ന് തീപടര്‍ന്നതാകാമെന്നാണ് കരുതുന്നത്. അതേസമയം പ്ലാന്റേഷന്‍ തോട്ടങ്ങളില്‍ തുടര്‍ച്ചയായി ഉണ്ടാവുന്ന തീപിടിത്തങ്ങള്‍ സമീപവാസികളെയും ആശങ്കയിലാക്കിയിരിക്കുകയാണ്.