വടക്കാഞ്ചേരി: ക്രൈസ്തവ വിശ്വാസി സമൂഹം അവരുടെ ജീവിത വഴിയിലെ ഏറ്റവും പുണ്യമായ ദിനങ്ങളിലേക്ക്. അന്‍പത് നോമ്പാചരണത്തിന്റെ ഭാഗമായുള്ള വിശുദ്ധ വാരാചരണത്തിന് തുടക്കമായി. യേശു ദേവന്റെ പീഡാസഹനം, കുരിശ് മരണം, ഉയിര്‍പ്പ് എന്നിവ അനുസ്മരിക്കും ഈ ദിനങ്ങളില്‍ വിശ്വാസി സമൂഹം. സഹനത്തിന്റെയും, സമാധാനത്തിന്റെയും മഹനീയതയുമായി കഴുത പുറത്തേറി യേശുദേവന്‍ ജെറുസലേം വീഥികളിലേയ്ക്ക് പ്രവേശിച്ചതിന്റെ സ്മരണ പുതുക്കിയാണ് ഓശാന ഞായര്‍ ആഘോഷിച്ചത്. ഇന്നലെ കാലത്ത് ദേവാലയങ്ങളില്‍ കുരുത്തോല വിതരണവും, പ്രദക്ഷിണവും നടന്നു. പ്രാര്‍ഥനയുടേയും, ത്യാഗത്തിന്റെയും സന്ദേശമോതി വിശുദ്ധവാര ശുശ്രൂഷകള്‍ക്കും തുടക്കമായി. വടക്കാഞ്ചേരി മേഖലയില്‍ നടന്ന ഓശാന ചടങ്ങുകളില്‍ നൂറ് കണക്കിന് വിശ്വാസികള്‍ കണ്ണികളായി വടക്കാഞ്ചേരി ഫൊറോന ദേവാലയത്തില്‍ ഫാ. തോബിയാസ് ചാലയ്ക്കല്‍ കാര്‍മികത്വം വഹിച്ചു.  സെന്റ് പയസ് കോണ്‍വെന്റില്‍ നിന്നായിരുന്നു കുരുത്തോല പ്രദക്ഷിണം. മച്ചാട് പള്ളിയില്‍ ഫാ: റാഫേല്‍ മുത്തുപീടിക, കരുമത്ര ആരോഗ്യ മാതാ പള്ളിയില്‍ ഫാ. ജോബി പുത്തൂര്‍, കുണ്ടന്നൂരില്‍ ഫാ. ജോജു പനയ്ക്കല്‍,  വരവൂര്‍ ദൈവസ്‌നേഹ മാതാ പള്ളിയില്‍ ഫാ. റോയ് വടക്കന്‍, കുമ്പളങ്ങാട് വിശുദ്ധ യൂദാ തദേവൂസ് ദേവാലയത്തില്‍ ഫാ. പോള്‍ ആലപ്പാട്ട്, മുള്ളൂര്‍ക്കര സെന്റ് ആന്റണീസ് പള്ളിയില്‍ ഫാ. ബാബു അപ്പാടന്‍ എന്നിവര്‍ കാര്‍മികത്വം വഹിച്ചു.