തുറവൂര്‍: കുമ്പളങ്ങിയില്‍ നിന്നു രാവിലെ 7.10 ന് ആലപ്പുഴയ്ക്ക് സര്‍വിസ് നടത്തിയിരുന്ന കെ.എസ്.ആര്‍.ടി.സി ബസ് നിറുത്തിയതോടെ ജനങ്ങള്‍ ദുരിതത്തിലായി. ദിനംപ്രതി ധാരാളം പേര്‍ ആലപ്പുഴയ്ക്ക് ഈ ബസില്‍ യാത്ര ചെയ്യുമായിരുന്നു.
എഴുപുന്ന, വാടയ്ക്കല്‍, കരുമാഞ്ചേരി ,എഴുപുന്നതെക്ക്, വല്ലേത്തോട്,ചങ്ങരം, പറയ കാട്, നാലുകുളങ്ങര, ചാവടി, തിരുമല, തുറവൂര്‍ എന്നീ പ്രദേശങ്ങളിലെ ജനങ്ങള്‍ ജോലിക്കും മറ്റ് ആവശ്യങ്ങള്‍ക്കും യാത്ര ചെയ്യുന്നതിന് കുമ്പളങ്ങി  ആലപ്പുഴ കെ.എസ്.ആര്‍.ടി.സി ബസ് സര്‍വിസ് വളരെ പ്രയോജനകരമായിരുന്നു.ബസ് സര്‍വിസ് മുടങ്ങിയതോടെ യാത്രാക്ലേശം രൂക്ഷമായി ജനങ്ങള്‍ വലയുകയാണ്. സ്വകാര്യ ബസ് ഉടമകളെ സഹായിക്കുന്നതിന് വേണ്ടിയാണ് കെ.എസ്.ആര്‍.ടി.സി ബസ് നിര്‍ത്തിയതെന്നാണ് ആക്ഷേപം. കുമ്പളങ്ങിയില്‍ നിന്ന് രാവിലെ 7.10 ന് ആലപ്പുഴയ്ക്കുള്ള കെ.എസ്.ആര്‍.ടി.സി ബസ് പുനഃരാരംഭിക്കാന്‍ ഇനിയെങ്കിലും ബന്ധപ്പെട്ടവര്‍ തയാറാകണമെന്ന് നാട്ടുകാര്‍ ആവശ്വപ്പെട്ടു.