കൊണ്ടോട്ടി: കൊണ്ടോട്ടി താലൂക്കിലെ വിവിധ ഭാഗങ്ങളില്‍ മലപ്പുറം റേഞ്ച് എക്‌സൈസ് പാര്‍ട്ടി നടത്തിയ പരിശോധനയില്‍ കഞ്ചാവു വില്പന സംഘത്തിലെ രണ്ടു പേര്‍ പിടിയില്‍. ഇവരില്‍ നിന്നു 150 പൊതി കഞ്ചാവു പിടികൂടി . കൊണ്ടോട്ടി എടവണ്ണപ്പാറ റോഡില്‍ വെച്ചു 38 പൊതി കഞ്ചാവുമായി കിഴിശ്ശേരി വിളയില്‍ സ്വദേശി കൊട്ടുക്കാരന്‍ ആശിക്കിനെയും മോങ്ങം അങ്ങാടിയില്‍ നിന്നു 112 പൊതികളുമായി മോങ്ങം ചാലില്‍ തൊടി അബ്ദുള്‍ ഖാദറിനെയുമാണ് അറസ്റ്റ് ചെയ്തത്. അന്യസംസ്ഥാന തൊഴിലാളികളില്‍ നിന്നു ചുരുങ്ങിയ വിലക്കു വാങ്ങി ചെറിയ പാക്കറ്റുകളാക്കി ഇവര്‍ക്കിടയിലും ഇടനിലക്കാര്‍ മുഖേന വിദ്യാര്‍ഥികള്‍ക്കിടയിലും വന്‍ ലാഭത്തിന്‍ വില്‍ക്കുന്നതിനിടെയാണ് ഇവര്‍ പിടിയിലാവുന്നത്.
മൂന്ന് ഗ്രാം, അഞ്ചു ഗ്രാം, ഏഴു ഗ്രാം എന്നീ അളവുകളില്‍ മാര്‍ക്കറ്റില്‍ കഞ്ചാവു ലഭ്യമാണ്. ഇവ ആവശ്യക്കാര്‍ക്കു ഫോണ്‍ മുഖേന പറയുന്നിടത്ത് എത്തിക്കലാണ് ഇടനിലക്കാരുടെ ജോലി. ഇതിന് ഇവര്‍ക്കു കമ്മീഷനുണ്ട്. ദിവസങ്ങളായി ഇവര്‍ എക്‌സൈസിന്റെ നിരീക്ഷണത്തിലായിരുന്നു. ആവശ്യക്കാര്‍ എന്ന വ്യാജേന നടത്തിയ നീക്കങ്ങളിലൂടെ ആണ് ഇവര്‍ വലയിലായത്. ജില്ലയിലേക്കു കഞ്ചാവ് എത്തിക്കുന്ന സംഘത്തെക്കുറിച്ചും ഇടനിലക്കാരെക്കുറിച്ചും വ്യക്തമായ വിവരം കിട്ടിയിട്ടുണ്ട്.
എക്‌സൈസ് ഇന്‍സ്‌പെക്ടര്‍ ടി.എന്‍ സുധീര്‍ പ്രിവന്റീവ് ഓഫിസര്‍ ജയപ്രകാശ് , അനീഷ് കുമാര്‍ പുത്തില്ലന്‍ ഒ. അബ്ദുള്‍ നാസര്‍ (ഐ ബി ) സി ഇ ഒ മാരായ വി അരവിന്ദന്‍, സതീഷ്‌കുമാര്‍ കെ, വിജയന്‍, ഡ്രൈവര്‍ ഉണ്ണികൃഷ്ണന്‍ എന്നിവര്‍ റെയിഡിനു നേതൃത്വം നല്‍കി. മലപ്പുറം കോടതിയില്‍ ഹാജരാക്കിയ പ്രതികളെ റിമാന്‍ഡ് ചെയ്തു.