നീലേശ്വരം: നീലേശ്വരത്ത് ഒറ്റ നമ്പര്‍ ചൂതാട്ടം തകൃതിയായി നടക്കുന്നു. മാര്‍ക്കറ്റ് ജങ്ഷന്‍ കേന്ദ്രീകരിച്ചാണ് പ്രധാനമായും ചൂതാട്ടം നടക്കുന്നത്. ചെറുവത്തൂര്‍ ഭാഗത്തേക്കുള്ള ബസ് സ്റ്റോപ്പാണ് ഇവരുടെ കേന്ദ്രം.
ഒരു ഷീറ്റ് കടലാസും പേനയും എപ്പോഴും ഇവരുടെ കൈയിലുണ്ടാകും. ഫോണില്‍ വിളിച്ച് നാലക്ക നമ്പര്‍ പറയാന്‍ ആവശ്യപ്പെടുകയും അത് ഇവര്‍ എഴുതിയെടുക്കുകയും ചെയ്യും. ബസ് സ്റ്റോപ്പിനു പുറകിലുള്ള രഹസ്യ കേന്ദ്രത്തില്‍ വച്ചാണ് നറുക്കെടുപ്പ്.
ദിവസവും ലക്ഷങ്ങളുടെ ചൂതാട്ടമാണ് ഇവിടെ നടക്കുന്നത്. പൊലിസ് സ്റ്റേഷന്‍ സമീപം തന്നെ ഉണ്ടായിട്ടും ഇതുവരെയായും നടപടിയില്ലാത്തത് വ്യാപക പ്രതിഷേധത്തിനിടയാക്കിയിട്ടുണ്ട്.