വാടാനപ്പള്ളി: ചാമക്കാല മഹല്ല്,വാടാനപ്പള്ളി തെക്കെ മഹല്ല് തെരഞ്ഞെടുപ്പുകളില്‍ സമസ്ത പാനലിന് സമ്പൂര്‍ണ വിജയം.
കേരള വഖ്ഫ് ബോര്‍ഡിന്റെ നേതൃത്വത്തില്‍ നടന്ന തെരഞ്ഞെടുപ്പില്‍ നിലവിലെ ഭരണസമിതി മുന്നോട്ടുവച്ച സമസ്തയുടെ പാനലാണ് വന്‍ വിജയം നേടിയത്. ചാമക്കാല മഹല്ല് തിരഞ്ഞെടുപ്പില്‍ പാനലിലെ 41 പേരും വിജയിച്ചു. 200ല്‍ പരം വോട്ടുകളുടെ ഭൂരിപക്ഷം സമസ്തയുടെ ഓരോ സ്ഥാനാര്‍ഥിക്കും ലഭിച്ചത്. ഇത് നിലവിലെ സമസ്ത ഭരണസമിതിക്കുള്ള അംഗീകാരമായി. ഒരു ദിവസം മുഴുവന്‍ നീണ്ട തെരഞ്ഞെടുപ്പു നടപടികള്‍ക്ക് അഡ്വ. എം.സി.എം കബീര്‍ പ്രിസൈഡിങ് ഓഫിസറായി.
പൗരാണികമായ വാടാനപ്പള്ളി തെക്കെ മഹല്ലില്‍ പാനലിലെ 21 പേരും വിജയിച്ചു. 2015ലെ തെരഞ്ഞെടുപ്പില്‍ വിജയിച്ച് സമസ്ത മഹല്ല് പരിപാലന സമിതി ഭരണം നടത്തിവരികയായിരുന്നു. ഒരു ബാലറ്റ് തെരഞ്ഞെടുപ്പിന്റെ ആവശ്യമില്ലാതിരുന്നിട്ടും ചില വ്യക്തികള്‍ വഖ്ഫ് ബോഡില്‍ പരാതിപ്പെട്ടതനുസരിച്ച് ബോര്‍ഡ് തെരഞ്ഞെടുപ്പ് പ്രഖ്യാപിക്കുകയായിരുന്നു.
അഡ്വ. മുഹമ്മദ് ഷാഫിയെയാണ് വഖ്ഫ് ബോര്‍ഡ് പ്രിസൈഡിങ് ഓഫിസറായി നിശ്ചയിച്ചിരുന്നത്.