കോണത്തുകുന്ന്: വെള്ളാങ്ങല്ലൂര്‍ പഞ്ചായത്തിലെ ആറാം വാര്‍ഡില്‍ ഉള്‍പ്പെട്ട കാരാട്ടുകുളം പാടശേഖരത്തിലെ പുല്ലിനു തീപിടിച്ചത് പരിഭ്രാന്തി പടര്‍ത്തി. ഇന്നലെ ഉച്ചക്ക് 12ഓടെയാണ് സംഭവം.
ഗെയില്‍ പൈപ്പ് ലൈന്‍ കടന്നു പോകുന്നതിനാല്‍ കൃഷി ഇറക്കിയിരുന്നില്ല. പാടശേഖരത്തില്‍ നിറഞ്ഞു നിന്നിരുന്ന പുല്ലിനു തീപിടിച്ചതോടെ തീ ആളിപ്പടരുകയായിരുന്നു.
കൊടുങ്ങല്ലൂരില്‍നിന്ന് ഫയര്‍ഫോഴ്‌സ് ജീവനക്കാര്‍ എത്തി തീ അണച്ചതിനാല്‍ നാശനഷ്ടങ്ങള്‍ ഒഴിവാക്കാന്‍ സാധിച്ചു.
സ്റ്റേഷന്‍ ഓഫിസര്‍ പ്രഭാകരന്‍, ലീഡിങ് ഫയര്‍മാന്‍ സുധന്‍, സുജിത്, സിനില്‍, വിഷ്ണു, സന്ദീപ് എന്നിവരുടെ നേതൃത്വത്തിലുള്ള സംഘമാണ് തീ അണച്ചത്. നാട്ടുകാരും തീ കെടുത്താനുള്ള ശ്രമങ്ങളുമായി രംഗത്തുണ്ടായിരുന്നു.