എരുമപ്പെട്ടി: അനധികൃതമായി മണ്ണ് എടുത്തിരുന്ന വാഹനങ്ങള്‍ എരുമപ്പെട്ടി പൊലിസ് പിടികൂടി. എരുമപ്പെട്ടി എ.ഇ.എസ് സ്‌കൂളിന്റെ സഹോദര സ്ഥാപനമായ സ്‌കൈ കല്യാണ മണ്ഡപം പ്രവര്‍ത്തിക്കുന്ന സ്ഥലത്ത് നിന്നാണ് വന്‍തോതില്‍ മണ്ണെടുത്തിരുന്നത്.
ദിവസങ്ങളായി നടത്തികൊണ്ടിരുന്ന മണ്ണെടുപ്പ് നാട്ടുകാര്‍ക്ക് ശല്യമായി മാറിയിരുന്നു. നാട്ടുകാര്‍ പരാതിപ്പെട്ടതിന്റെ അടിസ്ഥാനത്തില്‍ എസ്.ഐ ജോണിന്റെ നേതൃത്വത്തില്‍ പൊലിസ് സ്ഥലത്തെത്തി മണ്ണെടുപ്പ് നടത്തിയിരുന്ന മണ്ണുമാന്തി യന്ത്രവും ടിപ്പര്‍ ലോറിയും പിടികൂടുകയായിരുന്നു.മതില്‍ നിര്‍മാണത്തിന്റെ പേരിലാണ് മണ്ണെടുത്തിരുന്നത്. മണ്ണ് പുറത്തേക്ക് കടത്തിയിരുന്നതായി നാട്ടുകാര്‍ പറയുന്നു. പിടികൂടിയ വാഹനങ്ങള്‍ തുടര്‍ നടപടികള്‍ക്കായി ജിയോളജി വകുപ്പിന് കൈമാറി.