നീലേശ്വരം: നീലേശ്വരത്തെ കായിക പ്രേമികളുടെ ചിരകാലാഭിലാഷമായ ഇ.എം.എസ് സ്റ്റേഡിയം യാഥാര്‍ഥ്യത്തിലേക്ക്. ധനമന്ത്രി തോമസ് ഐസക് അവതരിപ്പിച്ച ബജറ്റില്‍ അഞ്ചു കോടി രൂപ നീക്കിവച്ചതോടെയാണിത്. കഴിഞ്ഞ ഇടതു മുന്നണി സര്‍ക്കാരിന്റെ കാലത്തു തന്നെ വോട്ട് ഓണ്‍ അക്കൗണ്ടിലൂടെ ഇതിനു തുക മാറ്റിവച്ചിരുന്നു. എന്നാല്‍ സര്‍ക്കാര്‍ മാറിവന്നതോടെ പദ്ധതി ഇല്ലാതായി. ആദ്യ മുഖ്യമന്ത്രിയായ ഇ.എം.എസിനെ തെരഞ്ഞെടുത്തയച്ചതിന്റെ ഓര്‍മയ്ക്കായാണ് അദ്ദേഹത്തിന്റെ പേരില്‍ നീലേശ്വരത്ത് സ്റ്റേഡിയം നിര്‍മിക്കുന്നത്.
പുത്തരിയടുക്കത്ത് നീലേശ്വരം ബ്ലോക്ക് ഓഫിസിന് മുന്‍വശത്താണ് സ്റ്റേഡിയത്തിനായി സ്ഥലം കണ്ടെത്തിയിരിക്കുന്നത്. നടപ്പു സാമ്പത്തിക വര്‍ഷത്തെ ബജറ്റില്‍ നഗരസഭയും കായിക മേഖലയുടെ വികസനത്തിനായി വിവിധ പദ്ധതികള്‍ ആവിഷ്‌കരിച്ചിരുന്നു.