മുക്കം: പൊതുവിദ്യാലയങ്ങളില്‍ മാത്രം പഠിച്ച് സംസ്ഥാന എന്‍ജിനീയറിങ് പ്രവേശന പരീക്ഷയില്‍ മികച്ച റാങ്ക് നേടിയതിന്റെ സന്തോഷത്തിലാണ് മുക്കം മണാശ്ശേരി എടക്കണ്ടിയില്‍ സമിക്കും കുടുംബവും. പട്ടികജാതി വിഭാഗത്തില്‍ ഒന്നാം റാങ്കാണ് ഈ മിടുക്കനെ തേടിയെത്തിയിരിക്കുന്നത്. കഴിഞ്ഞ വര്‍ഷം എന്‍ജിനീയറിങ് പ്രവേശന പരീക്ഷ എഴുതിയിരുന്നുവെങ്കിലും പ്രതീക്ഷിച്ച വിജയം നേടാനായിരുന്നില്ല. പിന്നീട് കഠിന പ്രയത്‌നത്തിലൂടെ ഒന്നാം റാങ്ക് നേടിയെടുക്കുകയായിരുന്നു.
മണാശ്ശേരി ഗവ. യു.പി സ്‌കൂള്‍, ചേന്ദമംഗല്ലൂര്‍ ഹയര്‍ സെക്കന്‍ഡറി സ്‌കൂള്‍, ദേവഗിരി സ്‌കൂള്‍ എന്നിവിടങ്ങളിലാണ് സമിക് പഠനം പൂര്‍ത്തിയാക്കിയത്.
മെക്കാനിക്കല്‍ എന്‍ജിനീയര്‍ ആവണമെന്നാണ് സമിക്കിന്റെ ആഗ്രഹം. പിതാവ് മോഹന്‍ദാസ് കാസര്‍കോട് നഗരസഭയിലെ റവന്യു ഓഫിസറാണ്. മാതാവ് കെ.പി ബബിഷ മണാശേരി സ്‌കൂളിലെ അധ്യാപികയാണ്. ഏക സഹോദരന്‍ ഋത്വിക് മോഹന്‍ കോഴിക്കോട് മെഡിക്കല്‍ കോളജില്‍ നാലാം വര്‍ഷ എം.ബി.ബി.എസ് വിദ്യാര്‍ഥിയാണ്. ഒന്നാം ക്ലാസ് മുതല്‍ പൊതുവിദ്യാലയങ്ങളിലാണ് സഹോദരന്‍ ഋത്വിക്കും പഠിച്ചത്. എസ്.എസ്.എല്‍.സി പരീക്ഷയില്‍ എല്ലാ വിഷയത്തിലും എ പ്ലസ് സമിക് നേടിയിരുന്നു. സംസ്ഥാന എന്‍ജിനീയറിങ് വിഭാഗത്തില്‍ ഒന്നാം റാങ്ക് നേടി സമിക്കിനൊപ്പം മെഡിക്കല്‍ പ്രവേശന പരീക്ഷയില്‍ മൂന്നാം റാങ്ക് നേടിയ എം.എ സെബയും ജില്ലയുടെ അഭിമാനമായി മാറി. രണ്ടു പേരും പൊതുവിദ്യാലയങ്ങളില്‍ മാത്രമാണ് പഠിച്ചതെന്നത് വിജയത്തിന്റെ മാറ്റുകൂട്ടുന്നു.