തൃക്കരിപ്പൂര്‍: ഗുരുനാഥന്‍മാരെയും മുതിര്‍ന്നവരെയും ബഹുമാനിക്കുകയും പൂര്‍വികരുടെ പാത പിന്തുടര്‍ന്നു വിനയവും ലാളിത്യവും സഹജീവി സ്‌നേഹവും ജീവിതത്തില്‍ പകര്‍ത്താനും പുതു തലമുറ തയാറാകണമെന്ന് സമസ്ത കേരള സുന്നീ ബാലവേദി സംസ്ഥാന പ്രസിഡന്റ് സയ്യിദ് പാണക്കാട് അസീല്‍ അലി ശിഹാബ് തങ്ങള്‍ അഭിപ്രായപ്പെട്ടു. തൃക്കരിപ്പൂര്‍ റെയ്ഞ്ച് സുന്നി ബാലവേദി ഉദിനൂര്‍ ഖാദിമുല്‍ ഇസ്‌ലാം ജമാഅത്ത് കമ്മിറ്റിയുടെ സഹകരണത്തോടെ സംഘടിപ്പിച്ച വിദ്യാര്‍ഥി പഠന ക്യാംപ് ഉദ്ഘാടനം ചെയ്യുകയായിരുന്നു തങ്ങള്‍. സി ഇബ്‌റാഹിം ഹാജി അധ്യക്ഷനായി. കന്‍വീനര്‍ ടി.കെ അബ്ദുസലാം മാസ്റ്റര്‍ ആമുഖ പ്രഭാഷണം നടത്തി. സംസ്ഥാന സെക്രട്ടറി അഫ്‌സല്‍ രാമന്തളി ഉത്‌ബോധന പ്രസംഗം നടത്തി. നിസാര്‍ പട്ടുവം, നസര്‍ ഫൈസി പാവന്നൂര്‍ ക്ലാസുകള്‍ നയിച്ചു. അബ്ദുല്‍ ഗഫൂര്‍ മൗലവി, ഖത്തീബ് സി അബ്ദുരഹീം ഫൈസി, ജുബൈര്‍ ഫൈസി പി ഷമീം അസ്അദി സംസാരിച്ചു.