അമ്പലപ്പുഴ: ഗ്രാമപഞ്ചായത്ത് അംഗം നസീന്റെ മരണം ഒരു ഗ്രാമത്തെ മുഴുവന്‍ കണ്ണീരിലാഴ്ത്തി. പുന്നപ്ര തെക്ക് ഗ്രാമപഞ്ചായത്ത് അംഗം പുന്നപ്ര പള്ളി വെളിയില്‍ നസീറിന്റെ ദാരുണ അന്ത്യമാണ് ഒരു ഗ്രാമത്തെ മുഴുവന്‍ കണ്ണീരിലാഴ്ത്തിയത്. ഇന്നലെ ഉച്ചക്ക് 1.30 ഓടെയായിരുന്നു സംഭവം.
വര്‍ഷങ്ങള്‍ക്ക് മുമ്പ് തന്നെ മരപ്പണി ആരംഭിച്ചിരുന്ന നസീര്‍ സമീപത്തെ തടിമില്ലില്‍ ജോലി നോക്കിയിരുന്നതിനിടയില്‍ മരം വെട്ട് ജോലിയും ചെയ്തിരുന്നു.
പഞ്ചായത്ത് അംഗമായതിനു ശേഷം മില്ലിലെ ജോലി നിര്‍ത്തി തന്റെ സമയം ജന സേവനത്തിനായി മാറ്റിവെച്ചെങ്കിലും മരം വെട്ടു ജോലിയും ചെയ്യുമായിരുന്നു. ഇന്നലെ ഉച്ചക്ക് കരുവാറ്റാ ഭാഗത്ത് വെട്ടിയിട്ട മരം വാളുകൊണ്ട് മുറിച്ചു മാറ്റുന്നതിനിടയില്‍ മരകഷണത്തിന്റെ ഒരു ഭാഗം തെറിച്ചുവന്ന് തലക്കടിയേല്‍ക്കുകയും സംഭവസ്ഥലത്ത് വെച്ച് തന്നെ മരണം സംഭവിക്കുകയുമായിരുന്നു.
കഴിഞ്ഞ പഞ്ചായത്ത് തിരഞ്ഞെടുപ്പില്‍ എസ്.ഡി.പി.ഐ സ്ഥാനാര്‍ത്ഥിയായി പത്താം വാര്‍ഡില്‍ നിന്നും വിജയിച്ച നസീര്‍ ജനകീയനായിരുന്നു. പത്താം വാര്‍ഡില്‍ റോഡുകളും വഴി വിളക്കുകളും കുടിവെള്ള പൈപ്പുകളും സ്ഥാപിച്ച് ജനശ്രദ്ധ നേടിയ ഇദ്ദേഹത്തെ നസീര്‍ മെമ്പര്‍ എന്നാണ് വിളിച്ചിരുന്നത്.
മരണം ദിവസം രാവിലെ എട്ട്് മണിയോടെ വാര്‍ഡ് സന്ദര്‍ശനത്തിനിറങ്ങിയ നസീര്‍, പുന്നപ്ര ബീച്ച് റോഡില്‍ കണ്ട മാലിന്യം കുഴിച്ച് മൂടിയതിനുശേഷം തന്റെ വാര്‍ഡിലെ വഴിവിളക്ക് തെളിക്കുന്നതിനായി കെ.എസ്.ഇ.ബി.യില്‍ എത്തി വിവരം ധരിപ്പിച്ചശേഷണാണ് മരം വെട്ടിനായി പോയത്.
മരണ വാര്‍ത്തയറിഞ്ഞ് നാടിന്റെ നാനാഭാഗത്ത് നിന്നും ആയിരങ്ങളാണ് വണ്ടാനം ആശുപത്രിയിലെ മോര്‍ച്ചറി പരിസരത്തും വീട്ടിലുമായി തടിച്ച് കൂടിയത്. പുന്നപ്ര വണ്ടാനം ഷറഫുല്‍ ഇസ്ലാം മസ്ജ്ദിന്റെ കമ്മറ്റി അംഗം കൂടിയായ നസീര്‍ മദ്യമുക്തിക്കായി പ്രവര്‍ത്തിച്ചും കാരുണ്യ പ്രവര്‍ത്തനം നടത്തിയും നാട്ടുകാരുടെ ശ്രദ്ധ പിടിച്ചുപറ്റിയിരുന്നു.
മരം വെട്ടിന് പോയാല്‍ അമിത തുക ഈടാക്കുകയില്ലെന്ന് മാത്രമല്ല, കൊടുക്കുന്ന തുക കൂടുതലാണെങ്കില്‍ തിരിച്ചുനല്‍കയും ചെയ്യുമായിരുന്നു.
നസീറിന്റെ മരണവാര്‍ത്തയറിഞ്ഞ് പുന്നപ്ര പ്രദേശങ്ങളിലെ എല്ലാ കടകമ്പോളങ്ങളും അടച്ച് ആദരാജ്ഞ്ഞലികള്‍ അര്‍പ്പിച്ചു. ആറും നാലും വയസുള്ള രണ്ടു ആണ്‍കുട്ടികളും രണ്ടു വയസുള്ള ഒരു പെണ്‍കുട്ടിയുമാണുള്ളത്്. നസീറിനെ അന്ത്യയാത്രയാക്കാന്‍ ഷറഫുല്‍ ഇസ്ലാം മദ്രസാഹാളിലും, പഞ്ചായത്ത് ഓഫീസ് പടിക്കലും നിറകണ്ണുകളോടെ നൂറുകണക്കിനാളുകളാണ് എത്തിചേര്‍ന്നത്.
മൃതദേഹം പുന്നപ്ര വണ്ടാനം ഷറഫുല്‍ ഇസ്ലാം മസ്ജിദ് ഖബര്‍സ്ഥാനില്‍ കബറടക്കി.