കോഴിക്കോട്: കേരളത്തിന്റെ താങ്ങും തണലും അനുഭവിച്ച് നാട്ടിലേക്കുപോയ അതിഥി തൊഴിലാളികളില്‍ പലരും നാട്ടില്‍ ദുരിതത്തില്‍. ആഴ്ചകള്‍ നീണ്ട ലോക്ക് ഡൗണ്‍ കാത്തിരിപ്പിനുശേഷം നാടുകളിലേക്ക് പ്രത്യേക ട്രെയിനുകളില്‍ പോയവരാണ് ശ്രദ്ധയോ, പരിചരണമോ, ഭക്ഷണമോ മറ്റു സൗകര്യങ്ങളോ ഇല്ലാതെ നാടുകളിലെ ക്യാംപുകളില്‍ കഴിയുന്നത്.

പലരും തങ്ങളുടെ ദുരവസ്ഥ കേരളത്തിലെ സുഹൃത്തുക്കളെയും മറ്റും അറിയിക്കുകയായിരുന്നു. കേരളത്തില്‍നിന്നു ബിഹാര്‍ ഉള്‍പ്പെടെയുള്ള സംസ്ഥാനങ്ങളിലേക്കുപോയ അതിഥി തൊഴിലാളികള്‍ക്കാണ് ഈ ദുര്യോഗമുണ്ടായിരിക്കുന്നത്.
ബിഹാറിലെ കടിഹാര്‍ ജില്ലയിലെ ഒരു ക്യാംപില്‍ കഴിയുന്ന കേരളത്തില്‍നിന്നു പോയവരുള്‍പ്പെടെയുള്ള 90 നടുത്ത് തൊഴിലാളികള്‍ നേരത്തിന് ഭക്ഷണമോ കുടിവെള്ളമോ പോലും ലഭിക്കാതെ കഷ്ടപ്പെടുകയാണ്.

[video width="640" height="352" mp4="http://suprabhaatham.com/wp-content/uploads/2020/05/WhatsApp-Video-2020-05-08-at-11.02.44-PM.mp4"][/video]

കേരളത്തില്‍ തിരൂരില്‍നിന്നു പുറപ്പെട്ടവരുള്‍പ്പെടെ 34 പേരാണ് കടിഹാറിലെ നൗറസിയ സ്‌കൂളിലെ ക്യാംപിലുള്ളത്. ഡല്‍ഹിയില്‍നിന്നു വന്നവരും ഈ ക്യാംപിലുണ്ട്. നേരത്തിന് ഭക്ഷണം ലഭിക്കുന്നില്ലെന്നും തങ്ങള്‍ കുടിക്കുന്നത് കുഴല്‍ കിണറിലെ മലിനജലമാണെന്നും ഇവര്‍ അയച്ച വീഡിയോ സന്ദേശത്തില്‍ പറയുന്നു. ഒരിക്കല്‍പോലും ആരോഗ്യപ്രവര്‍ത്തകര്‍ ഇവരെ സന്ദര്‍ശിച്ചിട്ടില്ല. പട്‌നയിലെ ധാനാപൂര്‍ റെയില്‍വേ സ്‌റ്റേഷനില്‍ ഇറക്കിയ ഇവരെ ബസുകളിലാണ് അതത് ജില്ലകളില്‍ എത്തിച്ചത്. 14 ദിവസത്തെ ക്വാറന്റൈയിന്‍ നിശ്ചയിച്ച് സ്‌കൂളുകള്‍ ഉള്‍പ്പെടെയുള്ള ക്യാംപുകളിലേക്ക് മാറ്റുകയായിരുന്നു.