കല്‍പ്പറ്റ: കൂടപ്പിറപ്പുകള്‍ക്ക് കൈത്താങ്ങായി കല്‍പ്പറ്റ നുസ്‌റത്തുദ്ധീന്‍ മുസ്‌ലിം സംഘത്തിന്റെ പ്രഥമ സമൂഹ വിവാഹം. എച്ച്.ഐ.എം.യു.പി സ്‌കൂളില്‍ പ്രത്യേകം സജ്ജമാക്കിയ വേദിയില്‍ മഹല്ലിലെ ആറ് പെണ്‍കുട്ടികളാണ് മഹല്ലിന്റെ കൈത്താങ്ങില്‍ വിവാഹ ജീവിതത്തിലേക്ക് കടന്നത്.
സാമ്പത്തിക ശേഷിയില്ലാത്തതിനാല്‍ മംഗല്യ സൗഭാഗ്യം ലഭിക്കാതെ പോകുന്ന തങ്ങളുടെ കൂടപ്പിറപ്പുകളെ കണ്ട് മഹല്ല് സംവിധാനം ഒരുമയോടെ പ്രവര്‍ത്തിച്ചതിന്റെ ഫലമായിരുന്നു നാടിന് ആഘോഷമായ സംഗമം.
മൈതാനി, അമ്പിലേരി, നെടുങ്കോട്, എമിലി, എസ്.കെ.എം.ജെ ഗൂഡലായ്കുന്ന്, ഓണിവയല്‍, കൈതക്കൊല്ലി, പുത്തൂര്‍വയല്‍, മഞ്ഞളാംകൊല്ലി, തുര്‍ക്കി, ഫാത്തിമ നൂര്‍ മസ്ജിദ്, എടഗുനി, വലിയ പള്ളി എന്നി പള്ളികള്‍ ഉള്‍ക്കൊള്ളുന്ന മഹല്ലിലെ 3000 കുടുംബങ്ങളാണ് സംഗമത്തെ വന്‍വിജയമാക്കിയവര്‍. മഹല്ല് നിവാസികള്‍ കൈമെയ് മറന്ന് നല്‍കിയ സംഭാവനയാണ് സംഗമത്തിന്റെ വിജയത്തിന് പിന്‍ബലമേകിയത്. ഓരോ കുട്ടികള്‍ക്കും 10 പവന്‍ സ്വര്‍ണവും വിവാഹ വസ്ത്രങ്ങളും സമ്മാനമായി നല്‍കിയ മഹല്ല് 15000ത്തോളം വരുന്ന അതിഥികള്‍ക്ക് ഭക്ഷണമൊരുക്കിയും അത്ഭുതം കാട്ടി. സമസ്ത പ്രസിഡന്റ് സയ്യിദ് മുഹമ്മദ് ജിഫ്‌രി മുത്തുക്കോയ തങ്ങളാണ് സംഗമം ഉദ്ഘാടനം ചെയ്തത്. മഹല്ല് പ്രസിഡന്റ് അഡ്വ. കെ മൊയ്തു അധ്യക്ഷനായി. പാണക്കാട് ബഷീറലി ശിഹാബ് തങ്ങള്‍ നിക്കാഹിന് നേതൃത്വം നല്‍കി. എസ്.വൈ.എസ് സംസ്ഥാന സെക്രട്ടറി അബ്ദുസമദ് പൂക്കോട്ടൂര്‍ മുഖ്യപ്രഭാഷണം നടത്തിയ ചടങ്ങില്‍ റാശിദ് ഗസ്സാലി കൂളിവയല്‍ ഉല്‍ബോധനം നടത്തി. സമസ്ത ജില്ലാ പ്രസഡിന്റ് കെ.ടി ഹംസ മുസ്‌ലിയാര്‍, വട്ടക്കാരി മജീദ് സംസാരിച്ചു.പിണങ്ങോട് അബൂബക്കര്‍, ജഅ്ഫര്‍ ഹൈതമി, സലീം മുസ്‌ലിയാര്‍ മണ്ണാര്‍ക്കാട്, സി.പി ഹാരിസ് ബാഖവി, പി.സി ഇബ്രാഹിം, മൊയ്തീന്‍കുട്ടി തന്നാടന്‍, ആര്‍.പി.എം തങ്ങള്‍, പയന്തോത്ത് മൂസ, പി.കെ അബൂബക്കര്‍, പി.പി ആലി, എ.പി ഹമീദ്, വി മൂസ ഗൂഡലായി, അബു, കെ മൊയ്തു, കുഞ്ഞബ്ദുല്ല ഹാജി, അലവി വടക്കേതില്‍, ബഷീര്‍ പുത്തുക്കണ്ടി, അറക്കല്‍ സൂപ്പിക്കുട്ടി, അഷ്‌റഫ് വേങ്ങാട്ട്, ടി ഹാരിസ് സംസം, മുജീബ് തങ്ങള്‍, ഹുസൈന്‍ തങ്ങള്‍, സ്വാദിഖ് തുറാബ് തങ്ങള്‍, കെ കുഞ്ഞിരായിന്‍ ഹാജി സംബന്ധിച്ചു. ചടങ്ങിന് മഹല്ല് സെക്രട്ടറി സി മൊയ്തീന്‍കുട്ടി സ്വാഗതം പറഞ്ഞു.