റിയാദ്: കേന്ദ്ര ഗവണ്മെന്റ് വിമാന സർവ്വീസിന് അനുമതി നൽകിയതോടെ ആരംഭിച്ച അടിയന്തിര വിമാന സർവ്വീസിൽ അനര്ഹയെന്നു ചൂണ്ടിക്കാണിച്ച് മാറ്റി നിർത്തപ്പെട്ട കൊവിഡ് ബാധിച്ച് മരണപ്പെട്ട ചെമ്മാട് സ്വദേശിയുടെ ഭാര്യയെ അടുത്താഴ്ചയുള്ള വിമാനത്തിൽ നാട്ടിലെത്തിക്കാൻ സൗകര്യമൊരുക്കുമെന്ന് എംബസി. ഏപ്രിൽ നാലിന് കോവിഡ് ബാധിച്ച് മരിച്ച ചെമ്മാട് സ്വദേശി സ്വാഫ്‌വാന്റെ ഭാര്യ ഖമറുന്നീസയുടെ യാത്ര സംബന്ധമായ പ്രശ്‌നങ്ങൾക്കാണ് താൽകാലിക പരിഹാരം കാണാനായത്. ഭർത്താവ് മരിച്ചതോടെ മറ്റു ബന്ധുക്കളോ മറ്റോ ഇല്ലാതെ ദുരിതത്തിലായ യുവതിയെ വെള്ളിയാഴ്ച്ചയാരംഭിച്ച ആദ്യ വിമാനത്തിൽ തന്നെ നാട്ടിലേക്കയക്കാൻ ശ്രമങ്ങൾ നടത്തിയെങ്കിലും വിവിധ കാരണങ്ങൾ കാണിച്ചു എംബസി ഇവരുടെ യാത്രക്ക് അനുമതി നിഷേധിക്കുകയായിരുന്നു. സന്ദർശക വിസയിൽ സഊദിയിലെത്തിയ യുവതി ഭർത്താവിന്റെ മരണ ശേഷം തനിച്ച് റിയാദിൽ ഏറെ സങ്കടക്കടലിൽ കഴിയുകയാണ്. സഹോദരനും ബന്ധുക്കളും ജിദ്ദയിൽ ഉണ്ടെങ്കിലും യാത്രാ വിലക്കുകൾ കാരണം അവർക്ക് യുവതിയുടെ അടുത്തേക്ക് എത്തിച്ചേരാൻ സാധിച്ചിട്ടില്ല.

     സ്വഫ്‌വാൻറെ മരണ ശേഷം യുവതി കൊവിഡ് ടെസ്റ്റിന് വിധേയമായെങ്കിലും നെഗറ്റിവ് ആണെന്ന് സ്ഥിരീകരിച്ചിരുന്നു. എങ്കിലും ഇവർ ക്വാറന്റൈനിൽ കഴിയുകയും ചെയ്‌തിരുന്നു. ഇവരുടെ ക്വാറന്റൈൻ കാലാവധിയും കഴിഞ്ഞ ശേഷമാണ് കഴിഞ്ഞ ദിവസം റിയാദിൽ നിന്നും വിമാന യാത്ര ആരംഭിച്ചിരുന്നത്. എന്നാൽ, ക്വാറന്റൈനിൽ കഴിയുന്നതിനാൽ യാത്ര അനുവദിക്കാൻ കഴിയില്ലെന്നായിരുന്നു എംബസിയുടെ ഭാഗത്ത് നിന്നും ലഭിച്ച ആദ്യ മറുപടി. ഇതിനിടെ നാട്ടിലേക്കയക്കണമെന്നാവശ്യപ്പെട്ട് എംബസിയിൽ രജിസ്റ്റർ ചെയ്‌തിരുന്നെകിലും പിന്നീട് എംബസിയിൽ അന്വേഷിക്കുമ്പോൾ ഇവരുടെ രജിസ്‌ട്രേഷൻ കാണാനാകുന്നില്ലെന്ന പരാതിയും ഉയർന്നു. പല തവണ രജിസ്‌ട്രേഷൻ നടത്തിയതിനു ശേഷമാണ് എംബസിയിൽ ഇത് രേഖപ്പെടുത്തപ്പെട്ടത്.

    കൂടാതെ, യുവതിയുടെ ദയനീയ സ്ഥിതി പരിഗണിച്ച് പലതവണ അംബാസിഡർ അടക്കമുള്ളവർക്ക് നിവേദനവും നൽകിയിരുന്നു. എന്നിട്ടും യാതൊരു വിധ പരിഗണനയും ഉണ്ടായില്ലെന്ന് ഇതിനു നേതൃത്വം നൽകിയ സാമൂഹ്യ പ്രവർത്തകർ അറിയിച്ചു. ഒടുവിൽ അടുത്തയാഴ്ച റിയാദിൽ നിന്നും കേരളത്തിലേക്കുള്ള വിമാനത്തിൽ യുവതിയെ കൊണ്ട് പോകാനുള്ള നടപടികൾ കൈക്കൊണ്ടതായാണ് ഒടുവിൽ എംബസി നൽകുന്ന വിവരം. എന്നാൽ, നിലവിൽ സാഹചര്യത്തിൽ അടുത്തയാഴ്ചയിലെ വിമാന സർവ്വീസ് ഇത് വരെ പ്രഖ്യാപിച്ചിട്ടില്ലെന്നത് ആശങ്ക ഉയർത്തുന്നുണ്ട്. അതേസമയം. അടുത്ത ദിവസങ്ങളിൽ കേരളത്തിലേക്കുള്ള മറ്റു വിമാന സർവ്വീസുകളിലെങ്കിലും നാട്ടിലെത്തിക്കാനുള്ള ശ്രമങ്ങൾ ഇപ്പോഴും തുടരുകയാണെന്ന് നേതൃത്വം നൽകുന്ന കെ എം സി സി നേതാവ് സിദ്ധീഖ് തുവ്വൂർ അറിയിച്ചു. അതിനിടെ, മുൻഗണന ലിസ്റ്റ് മറികടന്ന് ചിലർക്ക് വിമാനത്തിൽ സീറ്റ് ലഭ്യമായതായുള്ള ആരോപണവും ഉയർന്നിട്ടുണ്ട്.