തൃശൂര്‍: തപസ്യ കലാസാഹിത്യ വേദിയുടെ ആഭിമുഖ്യത്തില്‍ സാഹിത്യകാരന്‍ മാടമ്പ് കുഞ്ഞുകുട്ടന് മലയാളത്തിന്റെ ആദരം' പരിപാടി ജൂലൈ രണ്ടിന് കേരള സാഹിത്യ അക്കാദമിയില്‍ നടക്കും. മാടമ്പിന്റെ 77-ാം പിറന്നാളിനോടനുബന്ധിച്ചാണു പരിപാടി സംഘടിപ്പിക്കുന്നത്. രാവിലെ 10ന് ആരംഭിക്കുന്ന സാഹിത്യ സദസ് തപസ്യ സംസ്ഥാന പ്രസി. പി. നാരായണക്കുറുപ്പ് ഉദ്ഘാടനം ചെയ്യും. കെ.ബി ശ്രീദേവ് അധ്യക്ഷനാകും.
മാടമ്പ് കൃതികളിലെ വേദാന്ത ദര്‍ശനം എന്ന വിഷയം ആശാ മേനോനും മാടമ്പ് കൃതികളിലെ സ്‌ത്രൈണ ആവിഷ്‌കാരങ്ങള്‍ ഡോ. ടി.കെ കലമോളും അവതരിപ്പിക്കും. ഉച്ചക്കു 12ന് സ്‌നേഹവിരുന്നും രണ്ടിന് ദേശാടനം സിനിമാ പ്രദര്‍ശനവുമുണ്ടാകും. വൈകിട്ട് അഞ്ചിന് നടക്കുന്ന ആദരസഭയില്‍ തെക്കേമഠം മൂപ്പില്‍ സ്വാമിയാര്‍, സ്വാമി സദ്ഭവാനന്ദ, ഒ. രാജഗോപാല്‍ എം.എല്‍.എ, മഹാകവി അക്കിത്തം, സത്യന്‍ അന്തിക്കാട്, പി. ജയചന്ദ്രന്‍, പി.ടി കുഞ്ഞുമുഹമ്മദ്, വൈശാഖന്‍, കേന്ദ്ര സംഗീത നാടക അക്കാദമി ചെയര്‍മാന്‍ ശേഖര്‍ സെന്‍ സംബന്ധിക്കും. വടക്കുമ്പാട് നാരായണന്‍, മുരളി കൊളങ്ങാട്ട്, സി.സി സുരേഷ്, കെ. ഉണ്ണികൃഷ്ണന്‍ വാര്‍ത്താസമ്മേളനത്തില്‍ പങ്കെടുത്തു.