ചെര്‍പ്പുളശ്ശേരി: നെല്ലായ പഞ്ചായത്തിലെ വിവിധ സ്ഥലങ്ങളില്‍ വിഹരിക്കുന്നലഹരി മാഫിയക്കെതിരെ കഴിഞ്ഞ ദിവസം പന്ത്രണ്ടാം വാര്‍ഡ് മെമ്പര്‍ മൊയ്തുട്ടിയുടെ നേതൃത്വത്തില്‍ നടന്ന ലഹരി മുക്ത ബോധവത്ക്കരണ യോഗത്തില്‍ കയറി അക്രമം നടത്തുകയും ആക്ഷന്‍ കൗണ്‍സിലിന് നേതൃത്വം നല്‍കിയവരുടെ വീട്ആക്രമിക്കുകയുംചെയ്ത സാമൂഹ്യ വിരുദ്ധര്‍ക്കെതിരെനടപടി സ്വീകരിക്കാന്‍ വൈകുന്നതില്‍ പ്രതിഷേധം കനക്കുന്നു.പ്രദേശത്ത് സര്‍വ്വ ജനങ്ങളും രാഷട്രീയ കക്ഷി ഭേദമന്യെ പ്രതിഷേധവുമായി രംഗത്ത് വന്നപ്പോള്‍ പഞ്ചായത്ത് ഭരണകക്ഷിയായ സി.പി.എം വിട്ട് നിന്നത് ജനങ്ങളോടുള്ള വെല്ലുവിളിയും ലഹരി മാഫിയയെ സഹായിക്കുന്ന നിലപാടുമാണെന്ന് യു.ഡി.എഫ് നേതാക്കള്‍ വാര്‍ത്താസമ്മേളനത്തില്‍ പറഞ്ഞു.
പ്രദേശത്ത്കഞ്ചാവ് ലഹരി മാഫിയക്ക് നേതൃത്വം നല്‍കുന്നവരെകൃത്യമായിചൂണ്ടിക്കാണിച്ചിട്ടും നടപടി സ്വീകരിക്കാന്‍ പൊലിസ് തയാറായിട്ടില്ല. ഇത് ലഹരി മാഫിയയുമായി ചേര്‍ന്ന് പൊലിസ് നടത്തുന്ന കൂട്ടുകച്ചവടം ആണോ എന്ന് സംശയിക്കുന്നു എന്നും നേതാക്കള്‍ ആരോപിച്ചു.
നിഷ്‌ക്രിയത്വം അവസാനിപ്പിച്ച് പ്രതികളെ ഉടന്‍ അറസ്റ്റ് ചെയ്യാന്‍ പൊലിസ് തയ്യാറാകാത്ത പക്ഷം പൊലിസ് സ്റ്റേഷന്‍ മാര്‍ച്ച് ഉള്‍പ്പെടെ ശക്തമായ സമരവുമായി മുന്നോട്ട് പോകുമെന്ന് ഭാരവാഹികള്‍ അറിയിച്ചു.
പഞ്ചായത്ത് മെമ്പര്‍മാരായ മേലാടയില്‍ വാപ്പുട്ടി, കളത്തില്‍ മാനു, ദീപക് കുമാര്‍, പഞ്ചായത്ത് ലീഗ് പ്രസിന്റ് എം.ടി.എ നാസര്‍, കോണ്‍ഗ്രസ് ബ്ലോക്ക് സെക്രട്ടറി പി. ബാലന്‍, പഞ്ചായത്ത് ലീഗ് സെക്രട്ടറി കീഴ്‌ശ്ശേരി രായിന്‍, ഉനൈസ് മാരായമംഗലം, കെ.എം.കെ. ബാബു പങ്കെടുത്തു.