കൊല്‍ക്കത്ത: ഈസ്റ്റ് ബംഗാളിന്റെ മലയാളി താരം ജോബി ജസ്റ്റിന് ആറു മത്സരങ്ങളില്‍ വിലക്കും ഒരു ലക്ഷം രൂപ പിഴയും. ഐസ്വാളിനെതിരേയുള്ള മത്സരത്തില്‍ എതിര്‍ താരത്തിന്റെ മേല്‍ തുപ്പിയതിനാണ് ഐ ലീഗ് ഡിസിപ്ലിനറി കമ്മിറ്റി നടപടിയെടുത്തിട്ടുള്ളത്. സംഭവം നടന്നയുടന്‍ രണ്ട് മത്സരങ്ങളില്‍ നിന്ന് താല്‍ക്കാലിക വിലക്ക് ലഭിച്ചിരുന്നു. സംഭവം വിശദമായി പഠിച്ചതിന് ശേഷമായിരുന്നു പുതിയ വിലക്ക് ഏര്‍പ്പെടുത്തിയത്. ഐസ്വാള്‍ താരമായ കരീം ഓമോലോജക്കും ഒരു മത്സരത്തില്‍ വിലക്കും ഒരു ലക്ഷം പിഴയും ഏര്‍പ്പെടുത്തിയിട്ടുണ്ട്. ജോബിക്ക് സൂപ്പര്‍ കപ്പിലും കളിക്കാനാകില്ല. സീസണിലെ അവസാന മത്സരത്തില്‍ ശനിയാഴ്ച ഗോകുലത്തെ നേരിടുന്ന ഈസ്റ്റ് ബംഗാള്‍ ടീമില്‍ ജോബി കളിക്കില്ലെന്ന് ഉറപ്പായി.