റിയാദ്: കേന്ദ്ര സര്‍ക്കാര്‍ ആരംഭിച്ച അടിയന്തിര വിമാന സര്‍വിസില്‍ അനര്‍ഹയെന്ന് ചൂണ്ടിക്കാട്ടി മാറ്റിനിര്‍ത്തിയ കൊവിഡ് ബാധിച്ച് മരിച്ച മലപ്പുറം ചെമ്മാട് സ്വദേശിയുടെ ഭാര്യ ഖമറുന്നിസയെ അടുത്താഴ്ച നാട്ടിലെത്തിക്കാന്‍ സൗകര്യമൊരുക്കുമെന്ന് എംബസി. ഏപ്രില്‍ നാലിന് റിയാദില്‍ കൊവിഡ് ബാധിച്ച് മരിച്ച ചെമ്മാട് സ്വദേശി സ്വാഫ്‌വാന്റെ ഭാര്യ ഖമറുന്നിസയുടെ യാത്രാ സംബന്ധമായ പ്രശ്‌നങ്ങള്‍ക്കാണ് താല്‍ക്കാലിക പരിഹാരം കാണാനായത്.
ഭര്‍ത്താവ് മരിച്ചതോടെ മറ്റു ബന്ധുക്കളില്ലാതെ ദുരിതത്തിലായ യുവതിയെ വെള്ളിയാഴ്ച ആദ്യ വിമാനത്തില്‍ തന്നെ നാട്ടിലേക്ക് അയക്കാന്‍ ശ്രമങ്ങള്‍ നടത്തിയെങ്കിലും വിവിധ കാരണങ്ങള്‍ കാണിച്ച് എംബസി ഇവരുടെ യാത്രയ്ക്ക് അനുമതി നിഷേധിക്കുകയായിരുന്നു. സന്ദര്‍ശക വിസയില്‍ സഊദിയിലെത്തിയ യുവതി ഭര്‍ത്താവിന്റെ മരണശേഷം തനിച്ച് റിയാദില്‍ ഏറെ സങ്കടത്തിലാണ് കഴിയുന്നത്. സഹോദരനും ബന്ധുക്കളും ജിദ്ദയിലുണ്ടെങ്കിലും യാത്രാ വിലക്കുകള്‍ കാരണം അവര്‍ക്ക് യുവതിയുടെ അടുത്തേക്ക് എത്തിച്ചേരാന്‍ സാധിച്ചിട്ടില്ല.
സ്വഫ്‌വാന്റെ മരണശേഷം യുവതി കൊവിഡ് ടെസ്റ്റിന് വിധേയമായെങ്കിലും നെഗറ്റീവ് ആണെന്ന് സ്ഥിരീകരിച്ചിരുന്നു. എങ്കിലും ക്വാറന്റൈനില്‍ കഴിയുകയും ചെയ്തു. ഇവരുടെ ക്വാറന്റൈന്‍ കാലാവധിയും കഴിഞ്ഞ ശേഷമാണ് കഴിഞ്ഞ ദിവസം റിയാദില്‍നിന്ന് വിമാന സര്‍വിസ് ആരംഭിച്ചത്. എന്നാല്‍, ക്വാറന്റൈനില്‍ കഴിയുന്നതിനാല്‍ യാത്ര അനുവദിക്കാന്‍ പറ്റില്ലെന്നായിരുന്നു എംബസിയുടെ ഭാഗത്തുനിന്ന് ലഭിച്ച ആദ്യ മറുപടി. ഇതിനിടെ നാട്ടിലേക്ക് മടങ്ങണമെന്ന് ആവശ്യപ്പെട്ട് എംബസിയില്‍ രജിസ്റ്റര്‍ ചെയ്‌തെങ്കിലും പിന്നീട് അന്വേഷിച്ചപ്പോള്‍ ഇവരുടെ രജിസ്‌ട്രേഷന്‍ കാണാനാകുന്നില്ലെന്ന പരാതിയും ഉയര്‍ന്നു. പലതവണ രജിസ്‌ട്രേഷന്‍ നടത്തിയതിനു ശേഷമാണ് എംബസിയില്‍ ഇത് രേഖപ്പെടുത്തിയത്.
കൂടാതെ, യുവതിയുടെ ദയനീയസ്ഥിതി പരിഗണിച്ച് പലതവണ അംബാസിഡര്‍ അടക്കമുള്ളവര്‍ക്ക് നിവേദനവും നല്‍കിയിരുന്നു. എന്നിട്ടും യാതൊരുവിധ പരിഗണനയും ഉണ്ടായില്ലെന്ന് ഇതിനു നേതൃത്വം നല്‍കിയ കെ.എം.സി.സി നേതാവ് സിദ്ദീഖ് തുവ്വൂര്‍ അറിയിച്ചു. അതിനിടെ, മുന്‍ഗണനാ ലിസ്റ്റ് മറികടന്ന് ചിലര്‍ക്ക് വിമാനത്തില്‍ സീറ്റ് ലഭ്യമായതായുള്ള ആരോപണവും ഉയര്‍ന്നിട്ടുണ്ട്. ഒടുവില്‍ അടുത്തയാഴ്ച റിയാദില്‍നിന്ന് കേരളത്തിലേക്കുള്ള വിമാനത്തില്‍ യുവതിയെ കൊണ്ടുപോകാനുള്ള നടപടികള്‍ കൈക്കൊണ്ടതായാണ് എംബസി നല്‍കുന്ന വിവരം. എന്നാല്‍, നിലവിലെ സാഹചര്യത്തില്‍ അടുത്തയാഴ്ചയിലെ വിമാന സര്‍വിസ് ഇതുവരെ പ്രഖ്യാപിച്ചിട്ടില്ലെന്നത് ആശങ്ക ഉയര്‍ത്തുന്നുണ്ട്.