തോല്‍പ്പെട്ടി(വയനാട്): കര്‍ണാടകയില്‍ നിന്ന് കാറില്‍ ഒളിപ്പിച്ചു കടത്തുകയായിരുന്ന 32 കിലോ കഞ്ചാവ് പിടികൂടി. കേരള -കര്‍ണാടക അതിര്‍ത്തിയിലെ തോല്‍പ്പെട്ടി എക്‌സൈസ് ചെക്ക് പോസ്റ്റില്‍ നിന്നാണ് കഞ്ചാവുമായി രണ്ട് യുവാക്കളെ എക്‌സൈസ് സംഘം പിടികൂടിയത്.
കണ്ണൂര്‍ കൊള്ളാളിക്കാവ് നാരങ്ങോളി വീട്ടില്‍ നീരജ്(21), കണ്ണൂര്‍ കക്കാട് കുഞ്ഞിപ്പള ചെറുവത്ത് യാസിര്‍ അറഫാത്ത്(23) എന്നിവരാണ് പിടിയിലായത്.
കാറിന്റെ നാല് ഡോര്‍ പാഡുകള്‍ക്ക് ഉള്ളിലും ബോണറ്റിലും മറ്റുമായിരുന്നു കഞ്ചാവ് ഒളിപ്പിച്ചിരുന്നത്. ഡോറിനുള്ളില്‍ പല അറകളിലായാണ് കഞ്ചാവ് ഉണ്ടായിരുന്നത്. ബംഗളൂരുവില്‍ നിന്ന് കൊണ്ടുവരുന്ന കഞ്ചാവ് ചില്ലറ വില്‍പ്പനക്കാര്‍ക്ക് കൈമാറുന്ന സംഘമാണ് പിടിയിലായതെന്നാണ് സൂചന.
ജില്ലയില്‍ സമീപ കാലത്ത് നടക്കുന്ന ഏറ്റവും വലിയ കഞ്ചാവ് വേട്ടയാണിത്. മാനന്തവാടി എക്‌സൈസ് ഇന്‍സ്‌പെക്ടര്‍ എന്‍.കെ സുനില്‍, പ്രിവന്റീവ് ഓഫിസര്‍ കെ ശശി, സിവില്‍ എക്‌സൈസ് ഓഫിസര്‍മാരായ പി.കെ മനോജ്, കെ.കെ അനില്‍കുമാര്‍, അഭിലാഷ്, ഗോപി, മന്‍സൂര്‍ അലി, അജേഷ്, വിജയന്‍, രമേശ് ബാബു എന്നിവരാണ് പരിശോധനാ സംഘത്തിലുണ്ടായിരുന്നത്. പ്രതികളെ ഇന്ന് വടകര എന്‍.ഡി.പി.എസ് കോടതിയില്‍ ഹാജരാക്കും.
സമീപകാലത്ത് വയനാട് വഴി കഞ്ചാവ് കടത്ത് വര്‍ധിക്കുന്നതായി ലഭിച്ച സൂചനയെത്തുടര്‍ന്ന് എക്‌സൈസ് വിഭാഗം പരിശോധന കര്‍ശനമാക്കിയിട്ടുണ്ട്.