ഗുരുഗ്രാം: സ്‌കൂട്ടറിന് വഴി നല്‍കാത്തതില്‍ പ്രകോപിതയായ യുവതി ഓട്ടോ ഡ്രൈവര്‍ക്ക് നേരെ വെടിയുതിര്‍ത്തു. ന്യൂഡല്‍ഹിയിലെ ഗുരുഗ്രാമില്‍ കഴിഞ്ഞ ദിവസം രാവിലെയായിരുന്നു സംഭവം. സപ്‌ന (35) എന്ന യുവതിയാണ് 23കാരനായ സുനില്‍ കത്താരിയെന്ന ഡ്രൈവറെ വെടിവച്ചത്. സ്‌കൂട്ടറില്‍ വരികയായിരുന്ന സപ്‌ന മുന്നില്‍ നിറുത്തിയിട്ടിരുന്ന ഓട്ടോ ഡ്രൈവറോട് വാഹനം മുന്നോട്ടെടുക്കാന്‍ ആവശ്യപ്പെട്ടു. ആ സമയം മൊബൈലില്‍ സംസാരിച്ചു കൊണ്ടിരുന്ന സുനില്‍ ഇതിന് തയാറായില്ല. തുടര്‍ന്ന് ഇരുവരും തമ്മില്‍ രൂക്ഷമായ വാഗ്വാദം നടന്നു. പിന്നീട് സപ്‌ന കൈത്തോക്കുമായി എത്തി യുവാവിന് നേരെ വെടിയുതിര്‍ക്കുകയായിരുന്നു.