പേരാമ്പ്ര: ചേനോളിയിലെ സൗഹൃദാന്തരീക്ഷത്തിന് വിള്ളല്‍ വീണതോടെ പ്രദേശവാസികള്‍ ഭീതിയില്‍.
കഴിഞ്ഞ ദിവസമുണ്ടായ സി.പി.എം-ലീഗ് സംഘര്‍ഷത്തില്‍ പ്രദേശത്തുണ്ടായ സമാധാനാന്തരീക്ഷം തീര്‍ത്തും തകര്‍ന്നതോടെ നിരവധി കുടുംബങ്ങള്‍ ഭീതിയോടെയാണ് കഴിയുന്നത്. നാട്ടില്‍ ഏതു കാര്യങ്ങളിലും രൂപപ്പെട്ടു വന്ന കൂട്ടായ്മയാണ് ആക്രമണത്തിലൂടെ നഷ്ടപ്പെടുന്നത്.
ചേനോളിയില്‍ വര്‍ഷങ്ങളായി കച്ചവടം നടത്തി വരുന്ന കടയുടെ മുന്നില്‍ നടന്ന വാക്കുതര്‍ക്കം സംഘര്‍ഷത്തിലേക്കു നീങ്ങുമെന്ന് ആരും കരുതിയിരുന്നില്ല.
അക്രമികള്‍ സ്ത്രീകള്‍ മാത്രമുള്ള വീടിനെ ലക്ഷ്യംവച്ച് കല്ലേറു നടത്തിയതും ഫര്‍ണിച്ചറും വൈദ്യുതിയും നശിപ്പിച്ചതും ഭീതിയോടെയാണ് കാണുന്നത്. സാധാരണയായി രാഷ്ട്രീയം പറയുകയും സൗഹൃദത്തോടെ പിരിയുകയും ചെയ്യുന്ന ദിനങ്ങളില്‍നിന്നു മാറി കഴിഞ്ഞ ദിവസം വിദ്വേഷത്തോടും പകയോടും കൂടി സംഘര്‍ഷത്തിലേക്കു നീങ്ങിയത് ഏവരിലും ആശ്ചര്യമുണ്ടാക്കിയിട്ടുണ്ട്.
നൊച്ചാട് പഞ്ചായത്തിലെ പല ഭാഗത്തും രാഷ്ട്രീയ സംഘട്ടനങ്ങളും സംഘര്‍ഷങ്ങളും ഉണ്ടായപ്പോഴൊന്നും പ്രദേശത്ത് പ്രതികരണങ്ങളൊന്നും ഉണ്ടായിരുന്നില്ല.
ചേനോളിയില്‍ പ്രവര്‍ത്തിക്കുന്ന മദ്‌റസയുടെയും പള്ളിയുടെയും പല പരിപാടികളിലും നിലനിന്ന മത സൗഹാര്‍ദവും രാഷ്ട്രീയ ഇടപെടലും ഇതോടെ തകരുന്ന സാഹചര്യമാണുള്ളത്.
 സംഘര്‍ഷത്തിന്റെ ഭീതി വര്‍ധിപ്പിക്കുന്ന തരത്തില്‍ പള്ളി ഇമാമിനെ ഭീഷണിപ്പെടുത്തിയതും വര്‍ഗീയ വിദ്വേഷം വളര്‍ത്തുന്ന പ്രവൃത്തികളും ചര്‍ച്ചയായിട്ടുണ്ട്. സംഘര്‍ഷത്തില്‍ കോഴിഫാം ചുട്ടെരിച്ചതിലൂടെ വലിയ സാമ്പത്തിക നഷ്ടം ഉണ്ടായ ഉടമ ലോണെടുത്താണ് സ്ഥാപനം ആരംഭിച്ചത്.
 സംഭവത്തില്‍ വിവിധ രാഷ്ട്രീയ പാര്‍ട്ടികളും സന്നദ്ധ സംഘടനകളും പ്രതിഷേധിച്ചു. സംഘര്‍ഷം കൂടുതല്‍ വ്യാപിക്കുന്നതിന് മുന്‍പ് സത്വര നടപടികള്‍ വേണമെന്ന് വിവിധകക്ഷി നേതാക്കള്‍ ഉന്നത പൊലിസ് മേധാവികളോട് ആവശ്യപ്പെട്ടു.