കല്ലമ്പലം: നാവായിക്കുളത്ത് മൂന്നു കടകളില്‍ മോഷണം. ഒരു വീട്ടില്‍ മോഷണശ്രമവും നടന്നു. വെട്ടിയറ എന്‍.വൈ.സി ജങ്ഷനു സമീപം ബേബി അമ്മയുടെയും രാജന്റെയും പലവ്യഞ്ജന കടകളിലും മധുവിന്റെ റൈസ് മില്ലിലുമാണ് കഴിഞ്ഞദിവസം രാത്രിയില്‍ മോഷണം നടന്നത്. കടകളുടെ പൂട്ടുപൊളിച്ചാണു മോഷ്ടാക്കള്‍ അകത്തു പ്രവേശിച്ചത്. കടകളില്‍ നിന്ന് സിഗരറ്റ്, സോപ്പ് തുടങ്ങിയ സാധനങ്ങളും മേശയ്ക്കുള്ളില്‍ സൂക്ഷിച്ചിരുന്ന പണവും കവര്‍ന്നതായി കടയുടമകള്‍ പറഞ്ഞു.
കടകളുടെ സമീപത്തെ സുകുമാരപിള്ളയുടെ വീട്ടില്‍ മോഷ്ടാക്കള്‍ കയറിയെങ്കിലും ഒന്നും നഷ്ടപ്പെട്ടില്ല. അടുക്കള വാതില്‍ പൊളിച്ച് അകത്തുകടന്ന മോഷ്ടാക്കള്‍ കിടപ്പുമുറിയിലെ അലമാര തുറന്ന് സാധനസാമഗ്രികളെല്ലാം വലിച്ചിട്ട് അലങ്കോലപ്പെടുത്തി.
ശിവരാത്രിയോടനുബന്ധിച്ച് സമീപത്തുള്ളവര്‍ അടുത്തുള്ള പോളച്ചിറ ക്ഷേത്രത്തില്‍ വൃതാനുഷ്ഠാനത്തിനു പോയിരുന്നതായും ഇതു മനസിലാക്കിയാണ് മോഷണം നടത്തിയതെന്നും അനുമാനിക്കുന്നു. കടയുടമകളുടെ പരാതിയുടെ അടിസ്ഥാനത്തില്‍ കല്ലമ്പലം പൊലിസ് സ്ഥലത്തെത്തി തെളിവുകള്‍ ശേഖരിച്ചു.