തിരുവനന്തപുരം: അറ്റകുറ്റപ്പണികള്‍ക്കായി മൂന്നുവര്‍ഷം മുന്‍പ് പൊതുമരാമത്തിനു കൈമാറിയ ജനറല്‍ ആശുപത്രിയിലെ ഏഴാം വാര്‍ഡ് പണി പൂര്‍ത്തിയാക്കി തിരികെ നല്‍കാത്തതിനെ കുറിച്ച് അന്വേഷണം നടത്തണമെന്ന് സംസ്ഥാന മനുഷ്യാവകാശ കമ്മിഷന്‍ അധ്യക്ഷന്‍ ജസ്റ്റിസ് ആന്റണി ഡൊമിനിക് ഉത്തരവിട്ടു.
മാനസികാരോഗ്യ വിഭാഗമാണ് ഏഴാം വാര്‍ഡില്‍ പ്രവര്‍ത്തിച്ചിരുന്നത്. ഏഴാം വാര്‍ഡിലെ അറ്റകുറ്റപ്പണികള്‍ അടിയന്തരമായി പൂര്‍ത്തിയാക്കി കെട്ടിടം ആശുപത്രി സൂപ്രണ്ടിനു കൈമാറണമെന്നും കമ്മിഷന്‍ പൊതുമരാമത്ത് കെട്ടിടവിഭാഗം ചീഫ് എന്‍ജിനീയര്‍ക്ക് നിര്‍ദേശം നല്‍കി.
സ്വീകരിച്ച നടപടികള്‍ ഒരുമാസത്തിനുള്ളില്‍ പൊതുമരാമത്ത് വകുപ്പ് കമ്മിഷനില്‍ സമര്‍പ്പിക്കണം. 2015 ലാണ് ഏഴാം വാര്‍ഡ് പൊതുമരാമത്തിനു കൈമാറിയത്. അതിനു ശേഷം ചികിത്സയ്ക്കായി എത്തുന്ന രോഗികളെ ഒരു കണ്‍സള്‍ട്ടന്റ് പരിശോധിച്ച് വിദഗ്ധ ചികിത്സ നല്‍കിവരുന്നുണ്ടെന്ന് ആരോഗ്യവകുപ്പ് ഡയറക്ടര്‍ സമര്‍പ്പിച്ച റിപ്പോര്‍ട്ടില്‍ പറയുന്നു.
പേരൂര്‍ക്കട മാനസികാരോഗ്യ കേന്ദ്രം നാലര കിലോമീറ്റര്‍ ചുറ്റളവില്‍ ഉള്ളതിനാല്‍ ഗുരുതര രോഗികള്‍ ജനറല്‍ ആശുപത്രിയില്‍ എത്താറില്ലെന്നും ഡയറക്ടറുടെ റിപ്പോര്‍ട്ടിലുണ്ട്.
മനുഷ്യാവകാശ പ്രവര്‍ത്തകനായ രാഗം റഹിം നല്‍കിയ പരാതിയിലാണ് ഉത്തരവ്.