പേരാമ്പ്ര: വീട്ടാവശ്യത്തിന് മുറിച്ച തേക്ക് കഴിഞ്ഞ നാല് മാസമായി ഉപയോഗിക്കാന്‍ അനുവദിക്കാത്ത അധികൃതരുടെ നിലപാടിനെതിരേ പ്രതിഷേധിക്കാന്‍ സംയുക്ത കര്‍ഷക സംഘടനകളുടെ യോഗത്തില്‍ തീരുമാനം.
മുതുകാട്ടിലെ കൊമ്മറ്റത്തില്‍ ജോസഫ് എന്ന സണ്ണിയുടെ തേക്ക് മരമാണ് ഉപയോഗിക്കാനാകാതെ കിടക്കുന്നത്. 11ന് കോഴിക്കോട് കലക്ടറേറ്റിലേക്കു മരവുമായി മാര്‍ച്ചു നടത്താന്‍ ചക്കിട്ടപ്പാറയില്‍ നടന്ന യോഗത്തില്‍ സംഘടന തീരുമാനമെടുത്തു. കണ്‍വെന്‍ഷന്‍ അഖിലേന്ത്യ രാഷ്ട്രീയ കിസാന്‍ സംഘ് വൈസ് പ്രസിഡന്റ് ഡിജോ കാപ്പന്‍ ഉദ്ഘാടനം ചെയ്തു. സംയുക്ത കര്‍ഷകസംഘടനയുടെ ചെയര്‍മാന്‍ ജിതേഷ് മുതുകാട് അധ്യക്ഷനായി. കണ്‍വീനര്‍ ജോയി കണ്ണംചിറ സമര പ്രഖ്യാപന പ്രമേയം അവതരിപ്പിച്ചു. കൃഷിഭൂമിയില്‍ ഇറങ്ങുന്ന വന്യമൃഗങ്ങളെ നേരിടാന്‍ കര്‍ഷകന് അധികാരം നല്‍കുക, കര്‍ഷകരുടെ മുഴുവന്‍ കടങ്ങളും എഴുതി തള്ളുക, 1977 ന് മുമ്പ് കര്‍ഷകര്‍ കൈവശം വെച്ചു വരുന്ന ഭൂമിക്കു നികുതി സ്വീകരിച്ചു പട്ടയം നല്‍കുക, വനം, റവന്യൂ ഉദ്യോഗസ്ഥരുടെ കര്‍ഷക ദ്രോഹ നടപടികള്‍ അവസാനിപ്പിക്കുക തുടങ്ങിയ ആവശ്യങ്ങളാണു കര്‍ഷകസംഘടന മുന്നോട്ടുവെക്കുന്നത്.
ഒ.ഡി തോമസ്, ബേബി സക്കറിയാസ്, ബിനോയ് തോമസ്, ജോര്‍ജ് വട്ടുകുളം, ബേബി കാപ്പുകാട്ടില്‍, കെ.കെ രജീഷ്, ജോര്‍ജ് കുംബ്ലാനി, വിനീത് പരുത്തിപ്പാറ, തോമസ് ആനത്താനം, രാജന്‍ വര്‍ക്കി, കെ.കെ മത്തായി.