കോഴിക്കോട്: സമസ്ത കേരള ജംഇയ്യത്തുല്‍ മുഅല്ലിമീന്‍ പതിനാലാമത് കലാമേളയുടെ കോഴിക്കോട് ജില്ലാമത്സരം ഇന്ന് കുറ്റിക്കാട്ടൂര്‍ യമാനിയ്യ അറബിക് കോളജില്‍ നടക്കും.  57 റെയ്ഞ്ചുകളില്‍ നിന്നുള്ള നാന്നൂറില്‍പരം അധ്യാപക-വിദ്യാര്‍ഥി പ്രതിഭകള്‍ മാറ്റുരയ്ക്കും. 49 ഇനങ്ങളില്‍ അഞ്ച് വേദികളിലായാണ് മത്സരം. നാളെ നാലുമണിക്ക് വിളംബരജാഥയോടുകൂടിയാണ് ദ്വിദിന മേളയ്ക്ക് തുടക്കമാവുക. തുടര്‍ന്ന് യമാനിയ്യ ജനറല്‍ സെക്രട്ടറി ആര്‍.വി കുട്ടിഹസന്‍ ദാരിമി പതാക ഉയര്‍ത്തും.
അഞ്ചുമണിക്ക് സമസ്ത പ്രസിഡന്റ് സയ്യിദ് മുഹമ്മദ് ജിഫ്‌രി മുത്തുക്കോയ തങ്ങള്‍ ഉദ്ഘാടനം ചെയ്യും. ജംഇയ്യത്തുല്‍ മുഅല്ലിമീന്‍ ജില്ലാ പ്രസിഡന്റ് കെ.കെ ഇബ്‌റാഹീം മുസ്‌ലിയാര്‍ അധ്യക്ഷനാകും.
സമസ്ത മാനേജര്‍ കെ. മോയിന്‍കുട്ടി മാസ്റ്റര്‍ മുഖ്യപ്രഭാഷണം നടത്തും. 11 ന് രാവിലെ 8.30ന് കലാമത്സരങ്ങള്‍ ആരംഭിക്കും. അഞ്ചരയ്ക്ക് നടക്കുന്ന സമാപന സമ്മേളനത്തില്‍ സ്വാഗതസംഘം ചെയര്‍മാന്‍ കെ.പി കോയ അധ്യക്ഷനാകും. എം.കെ മുനീര്‍ എം.എല്‍.എ ഉദ്ഘാടനം ചെയ്യും. അഡ്വ. പി.ടി.എ റഹീം എം.എല്‍.എ അവാര്‍ഡ് വിതരണം ചെയ്യും. എസ്.കെ.എസ്.എസ്.എഫ് സംസ്ഥാന സെക്രട്ടറി റഷീദ് ഫൈസി വെള്ളായിക്കോട് അനുമോദന പ്രഭാഷണം നടത്തും.