ന്യൂഡല്‍ഹി: രാജ്യത്ത് മെയ് 12 മുതല്‍ ട്രെയിന്‍ സര്‍വീസുകള്‍ പുനരാരംഭിക്കാന്‍ തീരുമാനിച്ച് ഇന്ത്യന്‍ റെയില്‍വേ. യാത്രാ തീവണ്ടി സര്‍വീസുകള്‍ ഘട്ടംഘട്ടമായി തുടങ്ങാനാണ് ഇന്ത്യന്‍ റെയില്‍വേ തീരുമാനമെടുത്തത്.

ആദ്യഘട്ടമെന്ന നിലയില്‍ 15 ട്രെയിനുകളാണ് ഓടിക്കുകയെന്ന് റെയില്‍വേ പ്രസ്താവനയില്‍ വ്യക്തമാക്കി. തിങ്കളാഴ്ച്ച വൈകീട്ട് നാലു മണിമുതല്‍ ബുക്കിങ് ആരംഭിക്കും.

ഐ.ആര്‍.സി.ടി.സി വെബ്സൈറ്റ് വഴി മാത്രമേ ടിക്കറ്റുകള്‍ ലഭ്യമാകൂ, എല്ലാ സ്റ്റേഷനുകളിലും ടിക്കറ്റ് കൗണ്ടറുകള്‍ (പ്ലാറ്റ്‌ഫോം ടിക്കറ്റുകള്‍ ഉള്‍പ്പെടെ) അടച്ചിരിക്കുമെന്നും റെയില്‍വേ വ്യക്തമാക്കുന്നുണ്ട്.

സ്ഥിരീകരിച്ചതും സാധുതയുള്ളതുമായ ടിക്കറ്റുള്ള യാത്രക്കാരെ മാത്രമേ സ്റ്റേഷനില്‍ പ്രവേശിക്കാന്‍ അനുവദിക്കുകയുള്ളൂവെന്ന് റെയില്‍വേ മുന്നറിയിപ്പ് നല്‍കി. എല്ലാ യാത്രക്കാര്‍ക്കും മാസ്‌ക് ധരിക്കേണ്ടിവരുമെന്നും പുറപ്പെടുമ്പോള്‍ സ്‌ക്രീനിംഗ് നടത്തുമ്പോള്‍ കൊവിഡ് ലക്ഷണങ്ങളില്ലാത്തവരെ മാത്രമേ കയറാന്‍ അനുവദിക്കൂ. ട്രെയിനില്‍ സാമൂഹിക അകലം പാലിക്കണമെന്നും നിര്‍ദ്ദേശമുണ്ട്.

കൊവിഡ് വ്യാപനത്തെത്തുടര്‍ന്ന് മാര്‍ച്ച് 25 നാണ് പാസഞ്ചര്‍ സര്‍വീസുകള്‍ റെയില്‍വേ നിര്‍ത്തിവെച്ചത്.