മലപ്പുറം: പത്തനംതിട്ടയില്‍ നിന്ന് കാണാതായ ഡിഗ്രി വിദ്യാര്‍ഥിനി ജെസ്‌നയ്ക്കു വേണ്ടി മലപ്പുറത്ത് പൊലിസ് അന്വേഷണം നടത്തുന്നു.  മറ്റൊരു പെണ്‍കുട്ടിക്കൊപ്പം കോട്ടക്കുന്ന് ടൂറിസം പാര്‍ക്കില്‍ ജസ്‌നയെ കണ്ടെന്ന വിവരത്തിന്റെ അടിസ്ഥാനത്തിലാണ് അന്വേഷണം.

മേയ് 3ന് രാവിലെ 11 മുതല്‍ രാത്രി 8 വരെ ജസ്‌നയെന്ന് സംശയിക്കുന്ന കുട്ടിയും സുഹൃത്തും കോട്ടക്കുന്നിലുണ്ടായിരുന്നെന്നാണ് പൊലിസിന് ലഭിച്ച വിവരം. ദീര്‍ഘദൂരയാത്രക്ക് ശേഷം എത്തിയതെന്ന് തോന്നിക്കുംവിധമായിരുന്നു പെണ്‍കുട്ടികള്‍ ഇവിടെയെത്തിയത്. മറ്റ് ചിലരുമായി ഇവര്‍ സംസാരിക്കുന്നത് കണ്ടെന്നും റിപ്പോര്‍ട്ടുണ്ട്.

മാധ്യമങ്ങളിലൂടെ വാര്‍ത്തയും ചിത്രവും കണ്ടതോടെ അത് ജസ്‌നയായിരുന്നോ എന്ന് പാര്‍ക്കിലെ ജീവനക്കാര്‍ക്ക്  സംശയം തോന്നുകയായിരുന്നു. തുടര്‍ന്ന് ജീവനക്കാര്‍ വിവരം പൊലിസിനെ അറിയിച്ചു. മാത്രമല്ല, അന്ന് അവിടെ പരിപാടിക്കെത്തിയ ഒരു സാമൂഹ്യപ്രവര്‍ത്തകനും ഈ സംശയം ഉന്നയിച്ചിട്ടുണ്ട്. കുര്‍ത്തയും ജീന്‍സും ഷാളുമായിരുന്നു പെണ്‍കുട്ടികളുടെ വേഷം. വലിയ ബാഗും ഇവരുടെ പക്കലുണ്ടായിരുവെന്നാണ് ഇവര്‍ പറയുന്നത്.

മാര്‍ച്ച് 22നാണ് പത്തനംതിട്ട കൊല്ലമുള സ്വദേശി ജെസ്‌ന മരിയ ജയിംസിനെ കാണാതായത്.