കൊച്ചി: സമുദ്രസേതു ദൗത്യത്തിലൂടെ മാലിദ്വീപില്‍ നിന്നും കേരളത്തിലെത്തിയ ഗര്‍ഭിണി പ്രസവിച്ചു. പത്തനംതിട്ട സ്വദേശിനി സോണിയ ജേക്കബാണ് എറണാകുളത്തെ സ്വകാര്യ ആശുപത്രിയില്‍ ആണ്‍കുഞ്ഞിന് ജന്മം നല്‍കിയത്.

മാലിയില്‍ നഴ്‌സ് ആയ സോണിയ ഐ.എന്‍.എസ് ജാലാശ്വയിലാണ് കൊച്ചിയിലെത്തിയത്. കപ്പലില്‍ വെച്ചുതന്നെ പ്രസവവേദന അനുഭവപ്പെട്ട സോണിയയെ കൊച്ചിയില്‍ എത്തിയ ഉടന്‍തന്നെ മട്ടാഞ്ചേരിയിലെ ആശുപത്രിയിലേക്ക് കൊണ്ടുപോയി. പിന്നീട് സ്വകാര്യ ആശുപത്രിയിലേക്ക് മാറ്റുകയായിരുന്നു.

സോണിയ ഉള്‍പ്പെടെ 19 ഗര്‍ഭിണികളെയാണ് നാവികസേനയുടെ ഐ.എന്‍.എസ് ജാലാശ്വയില്‍ ഇന്ന് കൊച്ചിയിലെത്തിച്ചത്. 698 ഇന്ത്യക്കാരായിരുന്നു കപ്പലില്‍ ഉണ്ടായിരുന്നത്.