കോഴിക്കോട്: ഇടിയങ്ങര ശൈഖ് പള്ളിയിലെ 458-ാം അപ്പവാണിഭ നേര്‍ച്ചക്ക് നാളെകൊടിയേറും. രാവിലെ 9ന ് മഖാം അങ്കണത്തില്‍ സമസ്ത കേരള ജംഇയ്യത്തുല്‍ ഉലമ പ്രസിഡന്റ് സയ്യിദ് മുഹമ്മദ് ജിഫ്‌രി മുത്തുക്കോയ തങ്ങള്‍ കൊടി ഉയര്‍ത്തുന്നതോടെ നേര്‍ച്ചയുടെ പ്രധാന ചടങ്ങുകള്‍ക്ക് സമാരംഭം കുറിക്കും.
തുടര്‍ന്ന് സമസ്ത വിദ്യാഭ്യാസ ബോര്‍ഡ് ജന.സെക്രട്ടറി എം.ടി അബ്ദുല്ല മുസ്‌ലിയാരുടെ അധ്യക്ഷതയില്‍ ചേരുന്ന പണ്ഡിത സംഗമം സമസ്ത കേരള ജംഇയ്യത്തുല്‍ ഉലമ ജന.സെക്രട്ടറി പ്രൊഫ. കെ ആലിക്കുട്ടി മുസ്‌ലിയാര്‍ ഉദ്ഘാടനം ചെയ്യും. ജാമിഅ ദാറുസ്സലാം പ്രിന്‍സിപ്പല്‍ മൗലാനാ മൂസക്കുട്ടി ഹസ്രത്ത് മുഖ്യപ്രഭാഷണം നടത്തും.
അത്തിപ്പറ്റ മൊയ്തീന്‍ കുട്ടി മുസ്‌ലിയാര്‍ പ്രാര്‍ഥന നടത്തും. ബുധനാഴ്ച സിയാറത്തും, കൂട്ടപ്രാര്‍ഥനയും നടക്കും. വ്യാഴാഴ്ച രാവിലെ 11ന് ചേരുന്ന സമാപന ഖത്തം ദുആ മഹാസംഗമത്തിന് ജാമിഅ ദാറുസ്സലാം പ്രസിഡന്റ് പാണക്കാട് സയ്യിദ് ഹൈദരലി ശിഹാബ് തങ്ങള്‍ നേതൃത്വം നല്‍കും. സമസ്ത മുശാവറ അംഗങ്ങളായ മാണിയൂര്‍ അഹ്മദ് മുസ്‌ലിയാര്‍, കെ.കെ.പി അബ്ദുല്ല മുസ്‌ലിയാര്‍, കോട്ടുമല മൊയ്തീന്‍ കുട്ടി മുസ്‌ലിയാര്‍, എം.എം മുഹ്‌യുദ്ദീന്‍ മുസ്‌ലിയാര്‍ ആലുവ, മൊയ്തീന്‍ കുട്ടി ഫൈസി വാക്കോട് തുടങ്ങിയവര്‍ പങ്കെടുക്കും.