ഹരിപ്പാട്: മോദിയെ പുറത്താക്കൂ കര്‍ഷകരെ രക്ഷിക്കൂ എന്ന മുദ്രാവാക്യം ഉയര്‍ത്തി രാജ്യവ്യാപകമായി നടത്തുന്ന പ്രക്ഷോഭത്തിന്റെ ഭാഗമായി കര്‍ഷകര്‍ മുതുകുളത്ത് പ്രധാനമന്ത്രി നരേന്ദ്ര മോദിയുടെ കോലം കത്തിച്ചു. ഇന്നലെ രാത്രി ഏഴരയോടെ കര്‍ഷക സംഘം മുതുകുളം മേഖലാ കമ്മിറ്റിയുടെ നേതൃത്വത്തില്‍ ഹൈസ്‌കൂള്‍ ജങ്ഷനിലാണ് കോലം കത്തിച്ചത്. തുടര്‍ന്ന് നടന്ന യോഗം കര്‍ഷക സംഘം ജില്ലാ വൈസ് പ്രസിഡന്റ് കെ. വിജയകുമാര്‍ ഉദ്ഘാടനം ചെയ്തു. മേഖലാ പ്രസിഡന്റ് കെ.ഉണ്ണികൃഷ്ണന്‍ അധ്യക്ഷനായി. എന്‍.ദേവാനുജന്‍, കെ. ഗീതാകൃഷ്ണന്‍, രാമാനുജന്‍പിളള, എസ്. രാധാകൃഷ്ണന്‍, എസ്.ബിജു, എ.അജ്മല്‍ തുടങ്ങിയവര്‍ സംസാരിച്ചു.